Ден соолук жаңылыктары

Акыркы жанылыктар

21

05

2024

Кан басымын көзөмөлдөө олуттуу жүрөк-кан тамыр ооруларын алдын алууга жардам берет

21.05.2024

КР Саламаттык сактоо министри Алымкадыр Бейшеналиев КММАнын чет элдик студенттери менен жолугушту

21.05.2024

КР Саламаттык сактоо министри менен Палестина мамлекетинин Элчиси саламаттык сактоо тармагындагы кызматташууну талкуулашты

06.04.2024
Бишкек шаарында «Менин ден соолугум – менин укугум» аталышындагы Бүткүл дүйнөлүк ден соолук күнүнө арналган жарыш болуп өттү

Бүгүн, 6-апрелде, жыл сайын 7-апрелде белгиленүүчү Бүткүл дүйнөлүк ден соолук күнүн майрамдоонун алкагында «Менин ден соолугум – менин укугум» урааны астында жарыш болуп өттү.

Иш-чара Кыргыз Республикасынын Президенти Садыр Жапаровдун колдоосу астында КР саламаттык сактоо министри Алымкадыр Бейшеналиев жана КРдагы Бүткүл дүйнөлүк саламаттык сактоо уюмунун (БДСУ) өкүлү  Ливиу Ведрасконун башчылыгы менен уюштурулду. 

Ага ардактуу коноктор - Жогорку Кенештин депутаттары, КРнын көрүнүктүү спортчулары, министрлик жана ведомстволордун, эл аралык уюмдардын өкүлдөрү, ошондой эле медицина кызматкерлери, бишкектиктер жана борбор калаанын меймандары катышты.

Борбор калаадагы жарыш Кыргыз Республикасынын Саламаттык сактоо министрлигинин КРдагы Бүткүл дүйнөлүк саламаттык сактоо уюму менен биргеликте өткөрүлүп жаткан Ден соолук жумалыгынын башталышы болду.

Жарыштын катышуучуларынын жана меймандардын астында чыгып сүйлөгөн сөзүндө Кыргыз Республикасынын саламаттык сактоо министри Алымкадыр Бейшеналиев ар бир адамдын күнүмдүк жашоосуна физикалык активдүүлүктү интеграциялоонун маанилүү экендигин белгиледи. Ал Кыргызстандын бардык жарандары сергек жашоого укуктуу жана өзүнүн физикалык жана психикалык жыргалчылыгына кам көрүүгө жооптуу экендигин белгилеп кетти. 

" Саламаттык сактоо министрлиги ар бир адамды өзүнүн жашоосуна оң өзгөрүүлөрдү киргизүүгө жана өз саламаттыгына активдүү кам көрүүнү баштоого чакырат. Ден соолук – бул биздин эң баалуу байлыгыбыз, ал эми  физикалык активдүүлүк – сергек жашоо мүнөзүнүн негизги курамдарынын бири. Бүгүн биздин жарышты колдогондордун бардыгына жана биз Ден соолук күнүнүн алкагында уюштурган иш-чараларга катыша тургандарга ыраазычылык билдирем. Биз биргелешип активдүү жана дени сак коомду кура алабыз", - деп белгиледи министр.

КРдагы БДСУнун өкүлү, д-р Ливиу Ведраско ошондой эле бардык катышуучуларга ыраазычылык билдирди жана ушул жылдагы Бүткүл дүйнөлүк ден соолук күнүнүн: «Менин ден соолугум – менин укугум» урааны маанилүү экендиги тууралуу эскерте кетти.

"Чынында эле ден соолук – бул жөн гана артыкчылык эмес, бул ар бир адамга жеткиликтүү болууга тийиш болгон ар бир адамдын фундаменталдык укугу. Бүгүн биз аралыктан чуркап өтүү үчүн эле эмес, ошондой эле биздин негизги укугубуз болуп саналган ден соолукту колдой турганыбызды тастыктоо үчүн чогуу стартта турабыз. Эсиңиздерде болсун, биз бүгүн жасай турган ар бир кадам бизди дени сак жана бактылуу келечекке жакындатат», -деди ал.

Жарыш дени сак жана активдүү жашоого умтулууда өз колдоосун жана жигердүү катышуусун билдирген ар кандай курактагы жана ар кандай физикалык даярдыктагы көптөгөн катышуучуларды топтоду. Катышуучулар мелдештин, бирок эң маанилүү талаш – өз ден соолугу тууралуу талаштын духун сезишти.

7-апрелден 13-апрелге чейин өтө турган Ден соолук жумалыгынын алкагында өлкөнүн ар бир областында сергек жашоо мүнөзү, оорулардын алдын алуу, ошондой эле спорттук маданиятты өнүктүрүү тууралуу маалымдуулукту жогорулатууга багытталган иш-чаралар өтмөкчү. 

 

 

05.04.2024
Саламаттык сактоо министрлигинде өзгөчө кырдаалдардын же өзгөчө окуялардын кесепеттерин жоюу иш-чараларын жана калыбына келтирүү иштерин жүргүзүүнүн тартиби боюнча окутуу өткөрүлдү

Кыргыз Республикасынын Саламаттык сактоо министрлигинде 2024-жылдын 04-апрелинде бүткүл саламаттык сактоо министрлигинин жетекчилеринин катышуусу менен Кыргыз Республикасынын Министрлер Кабинетинин 2024-жылдын 22-февралында №77 “Өзгөчө кырдаалдардан же өзгөчө окуялардан келтирилген зыянды баалоонун, аны эсепке алууну системалаштыруунун тартибин жана Өзгөчө кырдаалдардын же өзгөчө окуялардын кесепеттерин жоюу боюнча иш-чараларды жана калыбына келтирүү иштерин жүргүзүүнүн тартибин бекитүү жөнүндө” токтомундагы көрсөтүлгөн иш-чараларды аткаруу боюнча Өзгөчө кырдаалдар министрлигинин Кырсыктардын тобокелин азайтуу боюнча Улуттук платформанын катчылыгынын жетекчиси Айдакеев Алмабек Абышевичтин катышуусу менен окуу өткөрүлдү.

Окууда саламаттык сактоо министрлигинин жетекчилери өздөрүнө тиешелүү болгон көйгөйлүү суроолоруна жоопторду алышты.

05.04.2024
Саламаттык сактоо уюмдарына 20 санарип рентген-флюорографиялык аппараттар алынып келинди

Бүгүн, 2024-жылдын 5-апрелинде, Кыргыз Республикасынын Саламаттык сактоо министри Алымкадыр Бейшеналиев Бишкек шаарындагы №4 үй-бүлөлүк медицина борборуна жана №5 үй-бүлөлүк медицина борборунун филиалына барып, калкка көрсөтүлгөн диагностикалык кызмат көрсөтүүнүн сапаты менен таанышты, ошондой эле министрге жаңы санариптик рентген-флюорографиялык аппараттардын иштеши көрсөтүлдү.

Министр жаңы санариптик аппараттардын келиши менен медицина кызматкерлеринин иши жеңилдеп, бейтаптар үчүн жакшы шарттар түзүлүп жатканын баса белгиледи. «Көптөгөн саламаттык сактоо уюмдарында аналогдук флюоро-аппараттары үчүн пленкалар менен көйгөйлөр болуп келген. Бул көйгөйдү чечүү үчүн “Кыргызфармация” мамлекеттик ишканасы аркылуу түз өндүрүүчүлөрдөн 20 аппарат сатылып алынды. Сатып алууга бөлүнгөн 200 миллион сомдун 71 миллион сомун үнөмдөй алдык, ал саламаттыкты сактоо уюмдарынын башка муктаждыктарына жумшалат. Азыр Бишкектеги ар бир үй-бүлөлүк медициналык борборунда флюорографиялык изилдөөлөрдү жүргүзүүгө шарттар бар”,-деди КРнын саламаттык сактоо министри Алымкадыр Бейшеналиев.

«Бүгүнкү күндө №5 үй-бүлөлүк медицина борборунун филиалында флюорография кабинети заманбап жабдыктар менен камсыз болду. Бул биздин бейтаптар үчүн да, биздин кызматкерлер үчүн да жакшы жаңылык. Биз эскилиги жеткен аппараттар менен иштечүбүз. Алар 2 күн иштесе, 3 күн иштебей, бейтаптарыбызга ыңгайсыздык жаратып келген. Жакынкы арада КР Саламаттыкты сактоо министрлигинин демилгеси менен Бишкек шаарындагы Үй-бүлөлүк медицина борборлоруна флюорографиялык аппараттар алынып, орнотулат, бул жарандардын убактысын үнөмдөөгө жана медициналык кызматтын жеткиликтүүлүгүн жогорулатууга шарт түзөт», - деди Памир Муратов,№5 үй-бүлөлүк медицина борборунун директору.

Санариптик рентген-флюорографиялык аппараттар Бишкектеги №3, 4, 5, 7, 8, 9 үй-бүлөлүк медицина борборлоруна орнотулган, ал эми  Чүй облусунун Москва райондук ЖДПБ, Ош шаардык ҮМБ, Ак-Талаа райондук ЖДПБ, Нарын облустук ҮМБ жана Баткен облусунун Кадамжай райондук ЖДПБ, Бишкек шаарындагы № 2, 6 үй-бүлөлүк медицина борборлоруна аппараттар жеткирүү жана орнотуу стадиясында.

04.04.2024
«Дарыгердин депозити» программасы 200 орунга көбөйдү

"Дарыгердин депозити» программасы 2019-ж. – 175 орун болсо, 2024-жылы кошумча 25 орун бөлүнүп, жалпы саны 200 орунду түздү. Анын ичинен 51 орун Үй-бүлөлүк дарыгерлерге каралган. 

 

Саламаттык сактоо министри Алымкадыр Бейшеналиев, бүгүн, КР ЖКнын депутатынын суроосуна жооп берип жатып, «Дарыгердин депозити» программасында 200 жаш дарыгерлер бар экенин жана ар бир квартал сайын 35 миң сом кошумча акча алаарын, Министрлик орундарды дагы көбөйтүү боюнча жумуштарды алып барып жатканын белгиледи.

 

Маалымат үчүн: 2023-жылы бюджеттик негизде ординатураны 431 киши бүтүргөн. Алардын 216 (50,1%) бүтүрүүчү облустардагы саламаттык сактоо уюмдарына бөлүштүрүлгөн.

04.04.2024
Бишкекте дагы бир мамлекеттик "Эл Аман" дарыканасы ачылды

2024-жылдын 3 апрелинде, Кыргыз Республикасынын Саламаттык сактоо министри Алымкадыр Бейшеналиев №10 ҮМБнун базасында «Эл Аман» мамлекеттик дарыканасынын ачылыш аземине катышты.

 

Министр өз сөзүндө республиканын саламаттык сактоо уюмдарынын базасында «Эл Аман» мамлекеттик аптекалар тармагынын ачылышы өлкөнүн калкын жеткиликтүү жана сапаттуу дары-дармек менен камсыздоого умтулуу экендигин белгиледи. Мамлекеттик аптека өлкөдөгү жеке дарыканаларга салыштырмалуу 10-15% арзандатылган жеткиликтүү баада дарылардын кеңири ассортиментин сунуштайт.

03.04.2024
КР Саламаттык сактоо министри БУУнун качкындар боюнча Жогорку комиссарынын Борбор Азиядагы өкүлү менен жолугушту

Бүгүн, 2024-жылдын 3-апрелинде, Кыргыз Республикасынын Саламаттык сактоо министрлигинде Кыргыз Республикасынын Саламаттык сактоо министри Алымкадыр Бейшеналиев менен БУУнун Качкындар боюнча комиссарлыгынын Борбордук Азиядагы качкындар боюнча аймактык өкүлү Ханс Фридрих Шоддер мырзанын жолугушуусу болуп өттү.

Жолугушуунун жүрүшүндө тараптар качкындар жана башпаанек издегендер, ошондой эле Кыргызстандын жарандары үчүн медициналык кызматтарга бирдей укуктарды камсыз кылуу маселелерин талкуулашты. Ошондой эле Качкындардын глобалдык форумунун алкагында кабыл алынган Кыргыз Республикасынын милдеттенмелерин аткаруу боюнча жүргүзүлүп жаткан иш-чаралар талкууланды.

 

Министр Кыргызстан БУУга мүчө жана БУУнун Качкындардын статусу боюнча эл аралык конвенциясына кол койгон мамлекет катары качкындардын жана башпаанек издегендердин медициналык кызматтарга бирдей укуктарын таануу жана биздин өлкөнүн жарандары менен бирдей камсыз кылуу боюнча бир катар милдеттенмелерди алганын белгиледи.

Ошентип, качкындар жана башпаанек издегендер үчүн мамлекеттик кепилдиктер программасына ылайык, б.а. Кыргыз Республикасынын Эмгек жана социалдык коргоо министрлигинин каттоосунда турган качкындар медициналык тейлөөнүн негизги пакети менен камсыздалат.

Кыргызстан БУУнун Качкындар боюнча жогорку комиссарынын башкармалыгы менен 2003-жылы качкындарга медициналык кызмат көрсөтүүгө мүмкүнчүлүк берген милдеттүү медициналык камсыздандыруу боюнча биринчи келишимдер түзүлгөндөн бери тыгыз кызматташып келет.

Учурда министрлик өзүнө жүктөлгөн милдеттерге ылайык 81 мамлекеттик жана жеке менчик төрөт үйлөрүндө “Туулгандыгы жана өлүмү тууралуу санариптик медициналык күбөлүк” маалыматтык тутумун иштеп чыгып, ишке киргизген. Система Калкты каттоо департаментинин жарандык абалдын актыларын жазуу органынын маалыматтык системасы менен интеграцияланган жана туулгандыгы жана өлгөндүгү тууралуу күбөлүктөрдү берүү үчүн негиз болуп саналат.

Ошондой эле, жаңы төрөлгөн балдарды мамлекеттик каттоо  менен 100 пайызга камсыз кылуу максатында «Мамлекеттик акселераторлор» программасы ишке киргизилген.

Программанын алкагында КРнын СӨМ жана КРнын ЭСКММ менен биргеликте ата-энелердин жаңы төрөлгөн балдарын каттоодон өткөрбөй коюу фактыларын жоюу боюнча чараларды көрүү пландаштырылууда. Маалыматтын негизги булагы болуп туулгандыгы тууралуу медициналык күбөлүктөр жана жарандык абалдын актыларын жазуу органынын туулгандыгы тууралуу күбөлүктөрү болот.

«Биз качкындар жана башпаанек издегендер туш болгон кыйынчылыктарды түшүнөбүз. Биздин өлкөдө качкындарга жана башпаанек издегендерге медициналык жардам көрсөтүү боюнча БУУнун эл аралык конвенциясынын шарттарын сактоону улантабыз. Ал эми БУУнун Качкындар боюнча жогорку комиссарынын Кыргызстандагы өкүлчүлүгү менен биргеликте мындан ары да жемиштүү иштейбиз деп ишенебиз”, - деп жыйынтыктады Кыргыз Республикасынын Саламаттык сактоо министри Алымкадыр Бейшеналиев.

02.04.2024
№2 үй-бүлөлүк медицина борборунда дагы бир мамлекеттик “Эл Аман” дарыканасы ачылды

Бүгүн, 2-апрелде Бишкектеги №2 Үй-бүлөлүк медицина борборунда кезектеги мамлекеттик “Эл Аман” дарыканасы ачылды. Дарыкананын ачылыш аземи Саламаттык сактоо министри Алымкадыр Бейшеналиевдин жана үй-бүлөлүк дарыгенрлердин катышуусунда өттү. 

Саламаттыкты сактоо министри Алымкадыр Бейшеналиев мындай демилгелердин маанилүүлүгүн белгиледи. “Дары-дармектердин жеткиликтүү баада болушу ден соолуктун гана эмес, социалдык адилеттүүлүктүн да маселеси. Арзандатылган баалар, кеңири ассортимент жана мындай дарыканаларды бардык аймакка жайылтуу менен медициналык тейлөөнүн сапатын жана өлкөдөгү жалпы ден соолуктун деңгээлин жогорулатууга жардам берет».

Эл Аман дарыканасы эң зарыл дарылардын тизмесине кирген дары-дармектердин кеңири ассортиментин сунуштайт. “Эл Аман” мамлекеттик дарыканаларында дары-дармектерге арзандатуу 10-15% түзөт, бул калктын кеңири катмары үчүн керектүү дары-дармектерге жетүүнү кыйла жеңилдетет.

 

Белгилей кетсек, өлкө боюнча жалпысынан 79 мамлекеттик дарыкана иштеп, калкты жеткиликтүү баада дары-дармек менен камсыз кылууда.

02.04.2024
“Кыргыз Республикасындагы саламаттык сактоо жумалыгы” эл аралык форуму башталды

Бүгүн, 2024-жылдын 2-апрелинде Бишкекте 2023-жылдын 2-апрелинен 4-апрелине чейин өтүүчү “Кыргыз Республикасындагы саламаттык сактоо жумалыгы” 18-Эл аралык конгресс-көргөзмө форуму өз эшигин ачты.

Кыргызстандын саламаттыкты сактоо тармагындагы жыл сайын өтүүчү негизги иш-чара – MedExpo Kyrgyzstan 2024тун ачылыш аземине КР саламаттыкты сактоо министри Алымкадыр Бейшеналиев, Бишкек шаарынын биринчи вице-мэри Мирланбек Байгончоков, Кыргыз Республикасындагы Пакистан Ислам Республикасынын элчиси Хасан Али Зайгам, Өзбекстан Республикасынын Кыргыз Республикасындагы Элчилигинин соода-экономикалык маселелер боюнча кеңешчиси Араббоев Абдугани Абдулхамид угли, Кыргыз Республикасындагы Америка соода палатасынын аткаруучу директору Айсулуу Сыдыгалиева, Россия Федерациясынын соода өкүлү Саманов Айнур Шамилевич жана башка медицинанын ар кандай тармагындагы адистери катышты.

 

Медицина тармагы боюнча Борбор Азиядагы беш ири көргөзмөнүн бири болгон бул иш-чара саламаттыкты сактоо тармагындагы адистер үчүн негизги окуя болуп саналат.

Алымкадыр Бейшеналиев өз сөзүндө саламаттыкты сактоо жарандардын физикалык бакубаттуулугу үчүн мамлекеттин камкордугун гана билдирбестигин баса белгиледи. «Адамдын ден соолугун коргоо – ар бир мамлекеттин туруктуу социалдык-экономикалык өнүгүүсүнүн негизги фактору. Биздин ар бирибиздин өмүрүнүн узактыгы жана калктын жалпы өндүрүмдүүлүгү практикалык медицинаны жана фармакологияны өнүктүрүүдөгү кесипкөйлүккө жараша болот. Бишкектин медицина тармагындагы көргөзмө индустриясынын регионалдык флагманы болуп жатканы менен сыймыктанабыз, ал саламаттыкты сактоо системасын жакшыртууга, ата мекендик өндүрүүчүлөрдүн атаандаштыкка жөндөмдүүлүгүн жогорулатууга, ошондой эле Кыргыз Республикасынынмедицина рыногунда заманбап диагностикалык жана дарылоо ыкмаларынын пайда болушуна өбөлгө түзөт».

 

MedExpo Кыргызстан 2024 – бул өлкөнүн саламаттыкты сактоо системасынын сапаттуу жана натыйжалуу иштөө маселелерин талкуулоо үчүн медициналык адистерди, мамлекеттик органдардын өкүлдөрүн, бизнес чөйрөлөрдү жана коомчулукту бириктирүү үчүн уникалдуу мүмкүнчүлүк. Мындан тышкары форум тажрыйба алмашуу, ата мекендик жана чет элдик акыркы жетишкендиктер менен таанышуу, ошондой эле ишкердик байланыштарды жана маанилүү келишимдерди түзүү үчүн уникалдуу аянтчаны түзөт. Көргөзмөнүн жүрүшүндө катышуучу компаниялар инновациялык медициналык жабдуулардын кеңири спектрин, диагностика, хирургия жана реабилитация үчүн жабдууларды, ошондой эле медицинанын бардык багыттары үчүн башка продуктыларды жана кызматтарды тартуулашат. Бул келген коноктор үчүн медицина тармагындагы акыркы жетишкендиктер менен таанышууга жана пайдалуу бизнес байланыштарды түзүүгө эң сонун мүмкүнчүлүк.

 

 

Жыл сайын салттуу түрдө көргөзмөлөр Кыргыз Республикасынын Өкмөтүнүн, Кыргыз Республикасынын Саламаттык сактоо министрлигинин, Кыргыз Республикасынын Саламаттык сактоо министрлигине караштуу Дары-дармек жана медициналык буюмдар департаментинин, Бишкек шаарынын мэриясынын, С.Б. Данияров атындагы кайра даярдоо жана квалификацияны жогорулатуу мамлекеттик медициналык институтунун, Америкалык соода палатасынын (AmCham) колдоосу менен өткөрүлөт.

 

Быйыл биргелешкен көргөзмөгө 10 өлкөдөн 80ден ашык компания катышат. Катышуучулардын географиясы: Беларусь, Италия, Пакистан, Польша, Россия, Кытай, Кыргызстан, Казакстан, Өзбекстан, Япония, ошондой эле Россия Федерациясынын Новосибирск облусунун Экономикалык өнүктүрүү министрлигинин жамааттык стенддери жана Беларусь Республикасынын “Белфармпром” холдингинин стенди түзүлдү.

01.04.2024
Кыргызстандын медицина кызматкерлери футзал боюнча мелдеште жеңишке жетишти

2024-жылдын 1-4-мартында Өзбекстан Республикасынын Самарканд шаарында кичи-футбол боюнча турнир болуп өттү, ага Кыргызстандын саламаттыкты сактоо уюмдарынын медицина кызматкерлеринин арасынан жаштар жана улуу муун командалары катышты.

Биздин медицина кызматкерлеринин футзал боюнча эл аралык турнирге катышуусу КР Саламаттык сактоо министри Алымкадыр Бейшеналиевдин демилгеси жана колдоосу менен ишке ашты. "Биздин медицина кызматкерлеринин футзал боюнча эл аралык турнирге катышуусу бир гана эң сонун жетишкендик эмес, бул биздин адистер үчүн өздөрүнүн спорттук чеберчилигин жана командалык духун көрсөтүүгө чоң мүмкүнчүлүк. Бул иш-чара медицина кызматкерлеринин арасында сергек жашоо образынын маанилүүлүгүн баса белгилейт", - деди КР Саламаттык сактоо министри Алымкадыр Бейшеналиев.

Өзбекстандын, Казакстандын жана Тажикстандын түрдүү медициналык мекемелеринин өкүлдөрү катышкан кызыктуу мелдеште Кыргызстандын командалары жогорку деңгээлдеги даярдыкты жана ынтымакты көрсөтүштү.

Күн сайын улуттун саламаттыгына жооптуу болгон кыргызстандык дарыгерлер командасы бул жолу спорттук чеберчилигин, командалык биримдигин көрсөтүштү. Алар өжөрлүгү жана жеңишке болгон умтулуусу менен турнирде татыктуу биринчи орунду ээлешти.

Команданын капитаны Съездбек Айтбаев жаштар тайпасында 16дан ашык команда ойноп, улуу муун арасында 9 команда болгонун белгиледи. Жаштар командасы финалда Казакстандын командасын утуп алса, улуу муун финалда Өзбекстан Республикасынан келген кесиптештери менен ойношту. «Мындай спорттук иш-чаралар медицина кызматкерлеринин арасында спорттук кыймылдын мындан аркы өнүгүшүнө дем берип, медицина чөйрөсүндөгү достукту жана кесиптештик мамилелерди чыңдоого жардам берет деп ишенебиз».

Ал ошондой эле медицина кызматкерлери арасында ушундай оюндарды Францияда жайкы мезгилде өткөрүү пландалып жатканын, ага биздин дарыгерлер катышып, байгелүү орундарды алганы жатканын кошумчалады.

29.03.2024
Курортология жана реабилитациялык дарылоо кыргыз илимий-изилдөө институтунда мамлекеттик аптека ачылды

Бүгүн, 2024-жылдын 29-мартында, Кыргыз Республикасынын Саламаттык сактоо министри Алымкадыр Бейшеналиев Курортология жана реабилитациялык дарылоо кыргыз илимий-изилдөө институтунун базасында «Эл Аман» мамлекеттик дарыканасынын ачылыш аземине катышты.

Министр өз сөзүндө республиканын саламаттык сактоо уюмдарынын базасында «Эл Аман» мамлекеттик аптекалар тармагынын ачылышы өлкөнүн калкын жеткиликтүү жана сапаттуу дары-дармек менен камсыздоого умтулуу экендигин белгиледи. Мамлекеттик аптека өлкөдөгү жеке дарыканаларга салыштырмалуу 10-15% арзандатылган жеткиликтүү баада дарылардын кеңири спектрин сунуштайт.

Курортология жана реабилитациялык дарылоо кыргыз илимий-изилдөө институтунда жылына 15 миңге жакын бейтап дарыланып, Таш-Дөбө, Бер-Булак, Кашка-Суу, Байтик, Арчалы, Арашан айылдарынын тургундары керектүү дары-дармектерди ҮДТнын дарыгерлери жазып берген рецепт боюнча сатып ала алышат.

Белгилей кетсек, өлкө боюнча жалпысынан 78 мамлекеттик дарыкана иштеп, калкты жеткиликтүү баада дары-дармек менен камсыз кылууда.

28.03.2024
НЕКРОЛОГ

Саламаттыкты сактоо системасы, анын ичинде Эне жана баланы коргоо улуттук борбору орду толгус жоготууга учурады. Эне жана баланы коргоо улуттук борборунун мурдагы директору, медицина илимдеринин доктору, илимий кызматкер Маймерова Гүлзат Шаршенбековна 51 жашында мезгилсиз дүйнөдөн кайтты.

Маймерова Гүлзат Шаршенбековна 1973-жылы 2-июнда Бишкек шаарында туулган. Гүлзат Шаршенбековна 2000-жылы Кыргыз мамлекеттик медициналык академиясын ийгиликтүү аяктап, 2010-жылы илимий ишмердүүлүгүн баштап, медицина илимдеринин кандидаты, 2016-жылы ага илимий кызматкер наамы ыйгарылып, 2018-жылы медицина илимдеринин доктору илимий даражасын ийгиликтүү коргогон.

   Мугалимдик эмгек жолун 2015-жылы баштаган, ал учурда Эне жана баланы коргоо улуттук борборунда клиникалык ординаторлордун жетекчиси болгон. 2019-жылдан бери Кыргыз Республикасынын Саламаттык сактоо министрлигинин алдындагы дипломдон кийинки билим берүүнүн координациялык кеңешинин катчысынын милдетин аткарып, жалпы практикадагы ординаторлордун күндөлүгүн түзүүгө активдүү катышкан.

2016-жылдан тарта Г.Ш.Маймерова Эне жана баланы коргоо улуттук борборунун директорунун илимий иштер боюнча орун басары кызматына дайындалгандан кийин 20 жылдан бери биринчи жолу балдар хирургиясы боюнча кандидаттык диссертация корголгон. Ошондон бери Эне жана баланы коргоо улуттук борборунун «Эне жана баланы коргоо» илимий журналында педиатрия, балдар хирургиясы жана акушердик-гинекология боюнча редактордун орун басары болуп эмгектенип келген. Гүлзат Маймерованын жигердүү ишинин натыйжасында 2020-жылдан баштап бул журнал Россия Федерациясынын Россиянын илимий цитаталар индексинин базасына киргизилген.

Жогорку категориядагы дарыгер, саламаттыкты сактоонун “Эмгек сиңирген ишмери” Гүлзат Шаршенбековна 2018-жылы Кыргыз Республикасынын саламаттыкты сактоо тармагында көп жылдык үзүрлүү эмгеги,калктын ден соолугун чыңдоого кошкон зор салымы, ошондой эле активдүү коомдук ишмердиги үчүн Кыргыз Республикасынын Жогорку Кеңешинин “Ардак Грамотасы” менен сыйланган. Ал мыкты сапаттарга ээ, өзүнө коюлган милдеттерди тез жана сапаттуу чече билген тажрыйбалуу адис эле.

   Гүлзат Шаршенбековнанын үй-бүлөсүнө, бир туугандарына жана жакындарына терең кайгыруу менен көңүл айтып, орду толгус кайгысын тең бөлүшөбүз!

 

Саламаттыкты сактоо министри Алымкадыр Бейшеналиев, министрдин орун басары Медербек Исмаилов, министрдин орун басары Айжамал Шамбетова, министрдин орун басары Бүбүжан Арыкбаева, министрдин орун басары Бакыт Жангазиев.

Эне жана баланы коргоо улуттук борборунун жетекчилиги жана кызматкерлери.

28.03.2024
НЕКРОЛОГ

2024-жылдын 27-мартында Ысык-Көл райондор аралык ооруларды алдын алуу жана мамлекеттик санитардык-эпидемиологиялык көзөмөлдөө борборунун башкы дарыгери Токтоназарова Алина Эсентуровна мезгилсиз дүйнөдөн кайтты. Ал өлкөнүн саламаттык сактоо тармагын өнүктүрүүдө өчпөс из калтырды.

Эмгек жолун 1998-жылы санитардык агартуу бөлүмүндө санитардык врач болуп баштаган, 2003-жылдан тартып Ысык-Көл райондук мамлекеттик санитардык-эпидемиологиялык көзөмөл борборунда тамак-аш гигиенасы боюнча санитардык дарыгер кызматын аркалаган. 2009-жылы Ысык-Көл облустук оорулардын алдын алуу борборунда мамлекеттик санитардык-эпидемиологиялык көзөмөл бөлүмүнүн башчысы, ал эми 2010-жылы санитардык бөлүмдүн башчысы болуп иштеген.

2012-жылы Кыргыз Республикасынын Өкмөтүнө караштуу Санитардык, ветеринардык жана фитосанитардык коопсуздук боюнча мамлекеттик инспекциясынын Бишкек шаардык инспекциясынын башкы санитардык көзөмөл адиси болуп дайындалган. 2013-жылы Ысык-Көл райондук мамлекеттик санитардык-эпидемиологиялык көзөмөл борборуна санитардык дарыгер болуп кайтып келген.

2021-жылы Ысык-Көл райондор аралык ооруларды алдын алуу жана мамлекеттик санитардык-эпидемиологиялык көзөмөлдөө борборунун башкы дарыгери болуп дайындалып, өмүрүнүн акыркы күндөрүнө чейин баа жеткис эмгегин улантты.

 

Анын кесипкөйлүгү, ишке берилгендиги жана жарандардын ден соолугуна болгон камкордугу кесиптештеринин эсинде түбөлүккө сакталат. Анын дүйнөдөн кайтканы бул керемет инсанды билген жана баалаган ар бир адам үчүн орду толгус жоготуу.

Токтоназарова Алина Эсентуровнанын үй-бүлөсүнө жана жакындарына терең кайгыруу менен көңүл айтабыз.

 

Саламаттык сактоо министри Алымкадыр Бейшеналиев, министрдин орун басары Медербек Исмаилов, министрдин орун басары Айжамал Шамбетова, министрдин орун басары Бүбүжан Арыкбаева, министрдин орун басары Бакыт Джангазиев. Оорулардын алдын алуу жана мамлекеттик санитардык-эпидемиологиялык департаментинин эмгек жамааты.

27.03.2024
Улуттук госпитал диагностикалык текшерүүлөрдү, ошондой эле атайын транспорт менен бейтаптарды ташуу кызматын көрсөтөт

Кыргыз Республикасынын Саламаттык сактоо министрлигине караштуу Улуттук госпиталда магниттик-резонанстык томография (МРТ) кабинети, компьютердик томография кабинети жана ангиография кабинети иштейт. Бейтаптар дарыгердин жолдомосу менен кабыл алынат.

Изилдөө баасы:

- МРТ текшерүү – 2100 сом;

MРТ бөлмөсү 24 саат бою иштейт.

Ич көңдөйүнүн жана наркозду талап кылган МРТ изилдөөлөрүнө бейтапты даярдоо тамактанууну жана суюктуктарды ичүүнү убактылуу чектөөнү камтышы мүмкүн. Кийимде металл буюмдар болбошу керек. МРТга каршы көрсөтмөлөр бейтаптын денесинде металл импланттарынын болушу.

 

- Компьютердик томография (КТ) – 1400 сом.

 

Ангиографиялык текшерүү – 5828 сом. Ангиографиялык текшерүүгө сарпталуучу материалдар бейтаптардын эсебинен камсыздалат.

 

Мындан тышкары, Улуттук госпиталдын базасында бейтаптарды кайра жандандыруу унаасы менен республиканын бардык аймактарына жеткирүү кызматы көрсөтүлүп, жол кире баасы саатына 826 сом, чакыруунун минималдуу убактысы 2 саат, километрге жараша күйүүчү май буйрутма берген тараптын эсебинен.

 

Жогоруда көрсөтүлгөн кызматтардын бардыгы Мамлекеттик монополияга каршы жөнгө салуу агенттиги менен макулдашылган жана бекитилгендигин белгилейбиз.

 

Кененирээк маалымат алуу жана алдын ала жазылуу үчүн 1295 кыска номуруна же 0755600161 байланыш номуруна чалсаңыз болот.

27.03.2024
Бишкекте “Шанхай кызматташтык уюмуна кирген өлкөлөрдө кардиологияны өнүктүрүүдөгү инновациялар жана технологиялар” конгресси өтүүдө

2024-жылдын 27-мартында Бишкекте ШКУ өлкөлөрүнүн Эл аралык медициналык конгресси ишин баштады. Конгресс 27-марттан 29-мартка чейин өтөт.

Көрүнүктүү окумуштуу жана клиницист академик, Социалисттик эмгектин баатыры Мирсаид Миррахимовдун жаркын элесине арналган конгресске ШКУга мүчө-мамлекеттердин саламаттык сактоо министрликтеринин өкүлдөрү, ШКУга мүчө-мамлекеттердин жана башка өлкөлөрдүн кардиология, ички жана тоо медицинасы боюнча алдыңкы окумуштуулары жана адистери, жаш окумуштуулар, жогорку окуу жайлардын жана илимий уюмдардын өкүлдөрү, ШКУ өлкөлөрүнүн улуттук илимий жана медициналык борборлорунун өкүлдөрү, ошондой эле эл аралык уюмдардын, анын ичинде ДССУнун өкүлдөрү жана башкалар катышууда.

Конгресстин максаты - ШКУга мүчө мамлекеттерде кардиология жана ички оорулар тармагындагы заманбап жетишкендиктерди жана алдыңкы тажрыйбаларды көрсөтүү, инновациялык технологияларды, фармацевтикалык продукцияларды жана медициналык жабдууларды практикалык медицинага киргизүү.

  «Бүгүн биз маанилүү саламаттык сактоо маселелерин талкуулоо жана конкреттүү иш пландарды иштеп чыгуу үчүн чогулуп жатабыз. Ар түрдүү өлкөлөрдүн өкүлдөрү жалпы максат болгон  журок-кан тамыр жана жугуштуу эмес ооруларга каршы күрөшүү үчүн бириккен. Биздин биригүүбүз жана билим алмашуубуз бул көйгөйлөргө каршы күрөшүүдө күчтүү курал болот деп ишенем. Кыргызстан изилдөөчүлүк ишмердүүлүктү активдештирүүгө жана кардиология, кардиохирургия жана ички оорулар боюнча заманбап илимий кластерлерди түзүүгө умтулууда. Бул аракеттер бизге дарт аныктоонун жана дарылоонун жаңы ыкмаларын иштеп чыгууга, биздин медициналык практиканын натыйжалуулугун жогорулатууга жана өлүм деңгээлин төмөндөтүүгө мүмкүндүк берет. Аны менен катар эл аралык кызматташуунун жана тажрыйба алмашуунун өзгөчө маанилүүлүгүн баса белгилешибиз керек”, - деп белгиледи Алымкадыр Бейшеналиев өз сөзүндө.

Адистердин маалыматы боюнча, Кыргызстанда 2021-жылы жүрөк-кан тамыр ооруларынан каза болгондордун көрсөткүчү 52,3%ды, ал эми жалпысынан жугуштуу эмес оорулардан көз жумгандардын көрсөткүчү 80% ашуунду түздү. Жүрөк-кан тамыр ооруларынан өлүмгө учурагандар негизинен жүрөктүн коронардык оорусунан (ЖКО), анын ичинде миокарддын курч инфаркты (МКИ), артериялык гипертензиядан (АГ), олуттуу жүрөк аритмиясынан жана өнөкөт жүрөк жетишсиздигинен (ӨЖЖ) келип чыгат. Ошондуктан стратегияларды жана стандарттарды иштеп чыгуу, жаңы жогорку эффективдүү моделдерди жана башкаруунун жогорку технологиялык жана инновациялык ыкмаларын киргизүүнүн негизинде ЖКТО менен ооруган бейтаптарга медициналык жардам көрсөтүүнү уюштуруунун заманбап системасын түзүү маанилүү.

Белгилей кетчү нерсе, өлүмдүн жана майыптуулуктун жогорку көрсөткүчтөрүнөн улам жүрөк-кан тамыр жана жугуштуу эмес оорулар Шанхай Кызматташтык Уюмуна (ШКУ) кирген өлкөлөрдө да олуттуу көйгөй болуп саналат. Бул өз кезегинде биргелешкен стратегияларды иштеп чыгуу жана ДССУнун программаларынын жана БУУнун Миң жылдыктын Декларациясынын алкагында саламаттыкты сактоонун бардык деңгээлдеринде медициналык жардамды уюштуруунун жогорку эффективдүү моделдери жана системаларын түзүү үчүн күч-аракеттерди бириктирүүнү талап кылат.

Конгресстин программасы кардиология, кардиохирургия, ички жана тоо медицинасы чөйрөсүндөгү акыркы сунуштарга жана иштеп чыгууларга, далилдерге негизделген маалыматтарга, саламаттыкты сактоонун бардык деңгээлдеринде медициналык жардамдын жогорку натыйжалуу системасын өркүндөтүүгө жана түзүүгө, ошондой эле эл аралык стандарттарга ылайык жаңы муундагы адистерди даярдоого багытталат.

26.03.2024
Республикалык клиникалык жугуштуу оорулар ооруканасынын оңдоп-түзөөгө жабылган 3 бөлүмү бейтаптарды кабыл ала баштады

“Республикалык клиникалык жугуштуу оорулар ооруканасынын 6 бөлүмү ноябрь айында оңдоп-түзөө иштерине байланыштуу жабылган. Ремонт иштери май айына чейин пландалган. Бирок биздин суранычыбыз боюнча 100 орундуу 3 бөлүмдүн оңдоо иштери бүткөрүлүп, бүгүнтөн тарта бейтаптарды кабыл алып баштадык. Себеби биздин оорулуулар башка ооруканаларга бөлүштүрүлүп жаткырылып жаткан”, - деп билдирди Республикалык клиникалык жугуштуу оорулар ооруканасынын башкы дарыгери Гулжигит Аалиев.

 Бул бөлүмдөрдө курч ичеги-карын инфекциялары, курч мүнөздөгү дем алуу органдарынын вирустук оорулары, скарлатина, танзилит, энтеровирустук инфекция менен ооругандар жаткырылат. Бул корпус 1989-жылы курулган, андан бери бир да жолу капиталдык оңдоодон өткөн эмес. Ошондуктан бардык системалар эскилиги жетип, иштен чыккан. Азыр канализация трубалары, суу түтүктөрү, электр чубалгылары толугу менен жаңыланды. Ошону менен бирге ар бир палатага инфекциялык көзөмөлдүн талабы болгон сырттан абаны тазалап киргизүүчү желдетүү системасы коюлду. 

Оңдоо иштери Дүйнөлүк банк тарабынан каржыланган “COVID-19га ыкчам чара көрүү” долбоорунун алкагында жүргүзүлүүдө.

 

Маалымат үчүн: Долбоордун максаты Кыргыз Республикасынын Өкмөтүнө тиешелүү профилактикалык иш-чараларды камсыз кылуу, уюмдарга дары-дармектерди, керектелүүчү материалдарды жана медициналык жабдууларды сатып алуу, ошондой эле саламаттык сактоо тармагындагы шарттарды жакшыртуу аркылуу COVID-19 пандемиясына каршы аракеттенүү мүмкүнчүлүгүн күчөтүүгө көмөк көрсөтүү болуп саналат.

26.03.2024
Улуттук кардиология жана терапия борборунда жогорку технологиялуу рентген хирургиясы боюнча эксперттик борбор ачылды

            Академик М.Миррахимов атындагы Улуттук кардиология жана терапия борборунда 2024-жылдын 26-мартында, “Ыкчам кардиология” программасын ишке ашыруунун алкагында, жүрөк-кан тамыр оорулары менен ооруган бейтаптарга ыкчам жогорку технологиялуу жардам көрсөтүүнүн толук циклинин моделине негизделген Кыргыз Республикасындагы биринчи жогорку технологиялуу рентген-хирургиялык борбордун ачылыш аземи Кыргыз Республикасынын Министрлер Кабинетинин Төрагасы – Кыргыз Республикасынын Президентинин Аппаратынын Жетекчиси Акылбек Жапаровдун, Кыргыз Республикасынын Саламаттык сактоо министри Алымкадыр Бейшеналиевдин, Дүйнөлүк банктын Өкүлчүлүгүнүн башчысы Навид Хасан Накви, УКжТ борборунун директору Талант Сооронбаев жана башкалардын катышуусунда өттү.

 

Бул борбор Дүйнөлүк банктын каржылык колдоосу менен “COVID-19га ыкчам чара көрүү” долбоорунун алкагында оңдолуп, сатылып алынган жогорку технологиялык ангиографиялык комплекс менен жабдылган, бул алдыңкы технологияларды жана инновацияларды колдонуу менен жогорку технологиялык медициналык жардамдын жеткиликтүүлүгүн жана сапатын камсыз кылат. Миңдеген бейтаптардын өмүрүн сактап кала турган уникалдуу аз инвазивдик эндоваскулярдык операцияларды клиникалык практикага киргизүүгө көмөктөшөт.

 

«Дүйнөлүк банктын колдоосу менен эң заманбап премиум класстагы ангиографиялык аппаратты сатып алууга жана бул жабдуулар үчүн тмаратты даярдоого каражат бөлүндү. Бул ангиографиялык бөлүм элибиздин жыргалчылыгы үчүн иштеп, миңдеген жүрөк-кан тамыр системасынын эрте операция жасаганга болбой турган оорулары бар бейтаптардын өмүрүн сактап калууга жардам берет деп ишенем», - деди саламаттык сактоо министри Алымкадыр Бейшеналиев.

 

 

Ачылыш аземдин алкагында Кытай Эл Республикасынын, Россиянын жана Казакстандын алдыңкы адистеринин колдоосу менен Кыргыз Республикасында биринчи жолу аорта клапанын транскатетердик имплантациялоо боюнча мастер-класс өткөрүлүүдө. Келечекте мындай операциялар бардык муктаж болгондор үчүн үзгүлтүксүз жүргүзүлөт. Ошондой эле инсульт жана жүрөк-кан тамыр системасынын башка оор оорулары үчүн эндоваскулярдык жогорку технологиялык операцияларды камтуу планы бар.

25.03.2024
КРВИ жана сасык тумоо боюнча эпидемиологиялык абал

Оперативдүү маалыматтар боюнча 2024-жылдын 12-жумасында (18.03-25.03.24-ж.) республика боюнча курч респиратордук вирустук инфекциялар жана сасык тумоо менен ооругандардын 4058 учуру катталды (и.к. 57,2), өткөн жумага (11-жума 88,0) салыштырмалуу -35%га төмөндөгөн. Бардык оорулардын 70%ы 14 жашка чейинки балдар.

 

Өткөн жылдын октябрь айынан тартып бейтаптардан 1925 үлгү алынган, лабораториялык жыйынтыктар боюнча эпидемиялык мезгил A/H3N2 тумоосу менен шартталган. Февраль айынан бери (05-жумадан бери) грипптин вирустарынын бөлүнүп чыгуусу жок. Курч респиратордук вирустук инфекциялардын циркуляциясы байкалууда, анда риновирус басымдуулук кылат – 32,1%, РС вирусу – 24,8%, I-IV парагрипп – 16,8%, башка вирустар 26,3% түзөт.

 

Республикада COVID-19 инфекциясына жумалык мониторинг уланууда. 12-жума ичинде Бишкек шаарында (4), Ош шаарында (3), Ош облусунда (1) 8 учур катталды.

 

Республика боюнча сасык тумоо, КРВИ жана COVID-19 оорусуна мониторинг жүргүзүү улантылууда, эпидемиологиялык абал көзөмөлдө.

22.03.2024
КР Саламаттыкты сактоо министри Кытайдын Хебэй провинциясынын Шаардык Комитетинин Катчысы менен кызматташууну талкуулады

2024-жылдын 18-22-мартында Кыргыз Республикасынын Саламаттык сактоо министри Алымкадыр Бейшеналиев жетектеген Кыргызстандын делегациясы Кытай Эл Республикасында болду.

 

2024-жылдын 21-мартында Кыргыз Республикасынын Саламаттык сактоо министри Алымкадыр Бейшеналиев Кытай Эл Республикасына болгон иш сапарынын алкагында Хебэй провинциясынын Провинциялык Комитетинин Туруктуу Комитетинин мүчөсү, Шаардык КПК Комитеттин Катчысы Чжан Чаочао мырза менен жолугушуу өткөрдү.

 

Жолугушууда тараптар өз ара пайдалуу кызматташуу маселелерин, ошондой эле медицина жана фармация тармагындагы узак мөөнөттүү мамилелерди чыңдоо жана мындан ары өнүктүрүү мүмкүнчүлүктөрүн талкуулашты.

 

Алымкадыр Бейшеналиев Шицзячжоу шаардык комитетине жана муниципалдык өкмөткө жылуу кабыл алгандыгы үчүн ыраазычылык билдирип, шаардын социалдык-экономикалык өнүгүүсүнүн көрүнүктүү натыйжаларына жогору баа берди. Ал Шицзячжоу шаарындагы биомедицина тармагында дары-дармек чыгарууда технологиянын жана инновациянын өнүгүшүн белгиледи. «Биз бул жумушчу жолугушуу Кытай Эл Республикасынын биомедициналык ишканалары менен Кыргыз Республикасынын Саламаттык сактоо министрлигинин ортосундагы практикалык кызматташтыкты илгерилетүүгө мүмкүнчүлүк болот деп ишенебиз».

22.03.2024
«Кыргызфармация» мамлекеттик ишканасы кытайлык фармацевтикалык компания менен кызматташуу келишимине кол койду

2024-жылдын 21-мартында Кыргыз Республикасынын Саламаттык сактоо министри Алымкадыр Бейшеналиев Кытай Эл Республикасына болгон жумушчу сапарынын алкагында Шицзячжуан шаарындагы (КЭР) дары-дармектерди жана активдүү заттарды иштеп чыгуу жана өндүрүү менен алектенген CSPC Corporation ири фармацевтикалык корпорациясына барды.

Жолугушуунун жыйынтыгында «Кыргызфармация» мамлекеттик ишканасы менен CSPC Corporation фармацевтикалык компаниясынын ортосунда фармацевтика тармагында кызматташуу – дары-дармектерди жана медициналык буюмдарды сатып алуу, ошондой эле Кыргыз Республикасынын аймагында дары-дармек өндүрүш аянтчасын куруу боюнча келишимге кол коюлду.

Маалымат үчүн: CSPC Corporation Кытай Эл Республикасындагы алдыңкы фармацевтикалык ишканалардын бири.

CSPC беш ишкерлик секторун камтыйт: инновациялык дары-дармектер, шишиктерге каршы дарылар, чийки заттар, даяр фармацевтикалык каражаттар жана фармацевтикалык каражаттарды сатуу. Корпорациянын продукциялары негизинен жети серияны жана миңге жакын ассортиментти камтыйт, анын ичинде антибиотиктер, витаминдер, жүрөк-кан тамыр ооруларына каршы дарылар, дене табын түшүрүүчү жана ооруну басаңдатуучу дарылар, тамак сиңирүү системасынын дарылары, шишикке каршы дарылар жана салттуу кытай медицинасынын даяр дарылары бар. CSPC Кытайда 10дон ашык фармацевтикалык өндүрүштүк базага ээ жана продукциясы дүйнө жүзү боюнча 100дөн ашык өлкөлөрдө жана аймактарда сатылат.

20.03.2024
Улуттук госпиталдын базасында кезектеги мамлекеттик «Эл Аман» дарыканалары ачылды

Бүгүн, 2024-жылдын 20-мартында, Кыргыз Республикасынын Саламаттык сактоо министри Алымкадыр Бейшеналиев Кыргыз Республикасынын Саламаттык сактоо министрлигине караштуу Улуттук госпиталдын базасында «Эл Аман» мамлекеттик дарыканаларынын ачылыш аземине катышты.

Министр өз сөзүндө Кыргыз Республикасынын Саламаттыкты сактоо министрлигинин калкка жеткиликтүү жана сапаттуу дары-дармек менен кызмат көрсөтүүгө умтулуусун баса белгиледи. “Эл Аман” дарыканалары калкка өлкөдөгү жеке дарыканаларга салыштырмалуу 10-15% арзандатылган, жеткиликтүү баадагы дары-дармектердин түрүн сунуштайт.

Республикада бардыгы болуп 77 мамлекеттик дарыкана иштеп, жеткиликтүү баада сапаттуу дары-дармек менен камсыз кылууда. Мындан тышкары, «Кыргызфармация» мамлекеттик ишканасы аркылуу эндопротездөө, стент коюу сыяктуу жогорку технологиялык медициналык кийлигишүүлөргө муктаж бейтаптар керектүү протездер жана стенттер менен камсыздалат.