Бүгүн, 2023-жылдын 23-ноябрында, Кыргыз Республикасынын Саламаттык сактоо министри Алымкадыр Бейшеналиев Жүрөк хирургиясы жана органдарды трансплантациялоо илимий-изилдөө институтунда болуп, институттун жетекчилиги менен балдардын кардиохирургиясынын абалын талкуулады.

Институттун жетекчилиги Кубатбек Урманбетов министрге 23-ноябрга карата тубаса жүрөк кемтиги менен ооруган 21 бала ооруканада дарыланып жатканын, алардын бардыгы пландуу операцияларды күтүп жатканын билдирди. Операциялар бир күн да токтобойт, медициналык жардамды компетенттүү балдар кардиохирургдары көрсөтөт.

Жолугушуунун жыйынтыгында министр балдардын абалын эске алуу жана баалоо менен балдардын ата-энелерине түшүндүрүү иштерин жүргүзүү, жүрөк оорулары менен жабыркаганбалдарга пландалган операцияларды жүргүзүү, бардык зарыл жардамдарды көрсөтүү жана балдардын операциясын катуу көзөмөлгө алуу тапшырмаларын берди.

2023-жылдын 22-ноябрында Бишкекте Саламаттык сактоо министрлиги жана Кыргыз медициналык ассоциациясы тарабынан уюштурулган форумда Кыргыз Республикасында кесиптик медициналык ассоциацияларды өнүктүрүүнүн чакырыктары жана мүмкүнчүлүктөрү талкууланды.

Форум негизги чечимдерди кабыл алуучуларга саламаттыкты сактоонун кадрдык камсыздоо чөйрөсүндөгү актуалдуу чакырыктар жана көйгөйлөр тууралуу маалымат берүү, аларды чечүүнүн мүмкүн болгон жолдорун талкуулоо жана саламаттыкты сактоо системасында кесиптик ассоциациялардын ролун күчөтүү максатында уюштурулган.

Форумга Министрлер Кабинетинин Төрагасынын орун басары Эдил Байсалов, Кыргыз Республикасынын Жогорку Кеңешинин депутаттары, Саламаттык сактоо министринин орун басары Айжамал Шамбетова, ДССУнун Кыргыз Республикасындагы өкүлү д-р Ливиу Ведраско, Швейцариянын Кыргызстандагы элчиси Оливье Бангертер, медициналык кесиптик коомдук уюмдар, дарыгерлер катышып, Казакстандын жана Өзбекстандын улуттук кесиптик бирикмелеринин жетекчилери форумдун ардактуу коноктору болушту.

Иш-чара Казакстан жана Өзбекстандын улуттук кесиптик медициналык ассоциациялары менен аймактык кызматташтыкты түзүүгө мүмкүндүк берет.

Форум Швейцариянын «Кыргыз Республикасындагы медициналык билим берүүнү реформалоо» долбоору (MER Project) менен тыгыз кызматташтыкта ​​уюштурулган. Долбоордун үчүнчү фазасы медициналык билим берүүнү реформалоону андан ары өнүктүрүү үчүн медициналык адистердин потенциалын жана сапатын жогорулатууга багытталган, анын ичинде кесиптик медициналык ассоциацияларды жана алардын медициналык билим берүүдөгү ролун, ошондой эле алардын мүчөлөрүнүн – Кыргызстандагы саламаттык сактоо тармагынынадистеринин“үнү” катары чыңдоо.

Бишкектин 33 жаштагы тургуну үч эм, эки кыз жана бир уулду жарык дүйнөгө алып келди. Ымыркайлар кош бойлуулуктун 36-жумасында кесарево жолу менен төрөлүшкөн.

Ымыркайлардын төрөлгөндөгү салмагы 3кг 10 грамм, 2кг 345 грамм жана 2 кг 45 гр болгон. Эне менен ымыркайлардын абалы туруктуу.
 

 #үчэм #балабакыт

2020-жылдын 17-ноябрында Бүткүл дүйнөлүк саламаттыкты сактоо уюму жатын моюнчасынын рагын жок кылуу боюнча глобалдык стратегиясы кабыл алынган.

Кыргызстанда 17-ноябрдан тарта жатын моюнчасынын рагы тууралуу маалымдуулукту жогорулатуу айлыгы башталды. Анын алкагында 2023-жылдын 20-ноябрында Бишкекте жатын моюнчасынын рагын жоюу боюнча пресс-кафе болуп өттү.

Жолугушууда катышуучулар жатын моюнчасынын жана эмчек рагы сыяктуу аялдардын ден соолугунун көйгөйлөрүн азайтуу боюнча учурдагы саясатты жана 2022-2030-жылдарга жатын моюнчасынын рагын жоюуну тездетүү боюнча максаттарды талкуулашты:

• 90% 15 жашка чейинки кыздарды АПВга каршы эмдөөдөн өткөрүү
• 70% 35 жаштагы аялдарды скринингден өткөрүп ооруну эрте аныктоо жана бул текшерүүнү 45 жашында кайрадан кайталап жүргүзүү
• 90% дарт аныкталган аялдарды көзөмөлгө алып эрте дарылоону баштоо.

Иш-чарага КР ЖК депутаты, ЖКнын социалдык саясат боюнча комитетинин төрайымы Винера Раимбачаева, КР Саламаттык сактоо министрлигинин башкы адиси Р.Асылбашева, ДССУнун улуттук кызматкери А.Алтымышева, Улуттук Онкология жана гематология борборунун директору Б.Султангазиева, Бишкек шаарынын мэриясынын шаардык саламаттыкты сактоо башкармалыгынын башчысы Б.Шамырканова катышып журналисттердин суроолоруна жооп беришти.   

Аялдар үй-бүлөдө жана коомдо маанилүү роль ойнойт, ошондуктан аялдардын ден соолугуна артыкчылык берүү жеке бакубаттуулукка гана эмес, бүтүндөй коомдун чыңдалышына өбөлгө түзөт.

Профилдик адистер эрте диагноз коюунун маанилүүлүгү жөнүндө токтолуп, рак ооруларынын ичинен бир гана жатын моюнчасынын жана сүт безинин рагын эмдөөнүн жардамы менен алдын алууга жана аны менен аялдын өмүрүн узартууга болорун айтып, элге маалымат жеткирүүдө журналисттердин салымы чоң экенин белгилешти. Ушул максатта биргеликте иш алып барууну талкуулашты.

Саламаттык сактоо министрлинин башкы адиси белгилегендей, жатын моюнчасынын рагы аялдардын рак ооруларынын арасында сүт безинин рагынан кийинки экинчи орунда турат.

«Тилекке каршы, бейтаптар медициналык жардамга өтө кеч, процессти токтотуу мүмкүн эмес болуп калган үчүнчү жана төртүнчү даражасында кайрылышат. Дарыгерлер бейтаптардын өмүрүн узартууга аракет кылышат. Бирок, жалгыз саламаттыкты сактоо системасынын аракети жетишсиз. Ар бир аял 45 жаштан кийин пландуу текшерүүдөн өтүп, оорунун алдын алуу үчүн гинекологдун көзөмөлүндө болушу керек», - деди Раиса Асылбашева.

Жыйындын жүрүшүндө, 17-ноябрда жарыяланган жатын моюнчасынын рагын жоюу боюнча Бирюза түстүү ноябрдын алкагында КР ЖКнын социалдык саясат боюнча комитетинин төрайымы Винера Раимбачаевага ДССУнун “Жатын моюнчасы жана сүт безинин рагына каршы күрөшүү боюнча ыктыярдуу элчиси” сертификаты тапшырылды.

Өз сөзүндө ЖКнын социалдык саясат боюнча комитетинин төрайымы Винера Раимбачаева, айымдарыбыз убагында керектүү изилдөөлөрдөн өтүп турушса бул дагы чоң жетишкендик болоорун белгилеп, өспүрүм кыздарды АПВга каршы эмдөөдөн өткөрүү дагы ооруну алдын-алуунун бирден-бир жолу болорун айтты. Ошондой эле бул ишке колдоо көрсөтүп мындан ары да өз көзөмөлүнө аларын кошумчалады.

Бул жылы 80ден ашык өлкөнүн улуттук жөнгө салуучу органдары сегизинчи жыл катары менен ДССУнун Уппсала дары-дармектердин коопсуздугуна мониторинг жүргүзүү борборунун (UMC) колдоосу астында, дары-дармектерге байланыштуу байкалган терс реакциялар жөнүндө билдирүүлөрдү көбөйтүүгө багытталган маалыматтык кампанияны колдоп жатышат.

Кампаниянын урааны "Ким билдире алат?" жана ар бир бейтаптын, дарыгердин, медайымдын жана фармацевттин терс таасирлерди билдирүүдө жана дары-дармектерди коопсуз колдонууга көмөктөшүүдөгү негизги ролуна көңүл бурат. Мүмкүн болуучу терс реакцияны так дифференциациялоо, аны туура каттоо жана көзөмөл органына билдирүү өтө маанилүү.

Дары-дармек каражаттарынын натыйжалуулугуна жана коопсуздугуна мониторинг жүргүзүүнүн максаты буга чейин белгилүү болгон терс реакциялар жөнүндө көбүрөөк маалымат алуу, ошондой эле жаңы терс реакцияларды аныктоо болуп саналат.

Кыргыз Республикасынын Дары каражаттары жана медициналык буюмдар департаменти ар бир жаранды дары-дармекке болгон терс реакциялар тууралуу билдирүүнү департаменттин http://www.pharm.kg  сайты аркылуу же шыр байланыш телефону аркылуу 0800 800 26 26 (Чалуу акысыз) билдирүү менен дары-дармектердин коопсуздугун камсыздоого салым кошууга чакырат.

2023-жылдын 16-17-ноябрында Кыргыз Республикасынын Саламаттык сактоо министрлигинин комиссиясы тарабынан Бишкек шаарында мыйзамсыз түрдө медициналык иш-аракеттерди (косметологиялык процедуралар) жүргүзгөн сулуулук салондоруна/кеңселерге текшерүү жүргүзүлдү.

  Текшерүүнүн жүрүшүндө тиешелүү лицензиясы жок иштеген 26 косметологиялык салон/кеңсе аныкталып, 84 000 сом айып пул салынды.

  Аталган косметология мекемелери Кыргыз Республикасынын Саламаттык сактоо министрлигинин лицензиясы жок иштеп, тиешелүү уруксаат кагаздары жок мыйзамсыз иш-аракеттерди, мыйзамсыз дарыгерлик менен алектенип, медициналык манипуляцияларды жана хирургиялык кийлигишүүлөрдү жүргүзүшкөн.

Калктын саламаттыгын сактоо, ошондой эле сапатсыз медициналык жардамды болтурбоо максатында Кыргыз Республикасынын Саламаттык сактоо министрлиги медициналык ишти жүзөгө ашырууга ыйгарым укуктуу мамлекеттик орган тарабынан берилген тиешелүү лицензиясы бар жеке медициналык уюмдарга кайрылууну сунуштайт.

Аталган кызматтарды көрсөтүү менен медициналык ишмердүүлүккө лицензиясы бар жеке медициналык уюмдардын тизмеси менен Кыргыз Республикасынын Саламаттык сактоо министрлигинин расмий сайтынын “Медициналык жана фармацевтикалык кызмат көрсөтүүлөрдү лицензиялоо” бөлүмүнөн төмөнкү шилтеме аркылуу таанышууга болот https://med.kg/lisenzirovanie.

2023-жылдын 17-ноябрында Ара төрөлгөн наристелердин күнүнө карата Эне жана баланы коргоо улуттук борборунда майрамдык иш-чара өткөрүлдү.

Кыргызстанда мөөнөтүнөн мурда төрөлгөн наристелердин күнү Эне жана баланы коргоо улуттук борборунда 8-ирет белгиленүүдө. Жаңы төрөлгөн ымыркайлардын жана ара төрөлгөн балдардын патологиясы бөлүмүнөн акыркы 10-15 жыл ичинде мөөнөтүнөн мурда жана өтө аз салмак менен ара  төрөлгөн балдар чакырылат.

Жыл сайын дүйнөдө жаңы төрөлгөн ымыркайлардын 6-8% ара төрөлсө, Кыргызстанда жылына 10-12 миңдей ымыркай айына жетпей төрөлөт. «Көп сандагы ара төрөлгөн ымыркайлардын дени сак жана толук кандуу эле эмес, чыгаан инсан болуп чоңойгондугун билүү абдан маанилүү. Көптөгөн көрүнүктүү инсандар мезгилинен эрте төрөлүп, жашоодогу оор башталыштарына карабастан укмуштуудай ийгиликтерге жетишти», - деп белгилешет адистер.

2004-жылы Кыргызстан Бүткүл дүйнөлүк саламаттык сактоо уюму (ДСУ) тарабынан сунушталган жаңы төрөлгөн ымыркайларды каттоонун критерийлерине толугу менен өткөн, ага ылайык, кош бойлуулуктун 22-жумасынан кийин дене салмагы 500 граммдан жогору болуп төрөлгөн ымыркайлар катталат.

Бүгүн, 17-ноябрда Кыргыз Республикасынын Саламаттык сактоо министри Алымкадыр Бейшеналиев Улуттук кардиология жана терапия борборунда болуп, анда бекер операцияларды жасоо боюнча бир жумалык кайрымдуулук акциясынын жыйынтыгы чыгарылды.

Жүрөк хирургиясы жана органдарды трансплантациялоо илим-изилдөө институтунда бир жуманын ичинде жасалма кан айландыруу шартында 14 бейтаптын жүрөгүнө ачык операциялар жасалды, анын ичинде 12 бейтапка жүрөк клапандары алмаштырылды. Эки бейтапка митралдык клапанга, дагы эки бейтапка жүрөктүн септалдык кемтигине операция жасалды. Ошондой эле, 31 бейтапка коронарография жасалып, анын ичинен 15 бейтапка коронардык артериясы кеңейтилип, 17 стент коюлган.

М.Миррахимов атындагы Улуттук кардиология жана терапия борборунда жүрөктүн коронардык оорусу менен жабыркаган 90 бейтаптын оору тарыхчасы боюнча талкуу жүргүзүлүп, бейтаптардын мурда жасалган коронарографиясы боюнча бардык маалыматтар каралып чыкты. Жыйынтыгында 51 бейтаптын коронардык артерияларына интервенциялык процедуралар (транслюминалдык ангиопластика жана стенттештирүү) жасалган. Бейтаптарга 62 стент коюлду.

Бардык операциялар жана интервенциялык процедуралар Сауд Аравиясынан келген дарыгерлердин жана кыргызстандык адистердин катышуусунда өттү.

КР Саламаттык сактоо министри Алымкадыр Бейшеналиев Сауд Аравиясынан келген адистерге элдин саламаттыгын сактоого кошкон баалуу салымы үчүн терең ыраазычылык билдирди. Ал ошондой эле Кыргызстан менен Сауд Аравиясынын ортосунда көптөгөн тармактарда абдан тыгыз кызматташтык бар экенин, активдүү тармактардын бири саламаттык сактоо тармагы экенин баса белгиледи. «Бул иш-чаранын аркасында 80ден ашуун бейтап текшерүүдөн өтүп, дарыланууга мүмкүнчүлүк алды. Иш-чара ошондой эле эки өлкөнүн адистеринин тажрыйба алмашуусу үчүн жакшы аянтча болду. Ошондой эле октябрь айынын аягында Сауд Аравия Королдугунун Кыргыз Республикасындагы элчиси Ибрахим бин ради Аль-Ради мырза менен болгон жолугушууда аймактарга 10 фельдшердик-акушердик пункттун курулушу, ошондой эле көп тармактуу клиника куруу мүмкүнчүлүгү талкууланган. Андыктан биздин кызматташуубуз мындан ары да уланат жана жемиштүү болот деп ойлойм», - деди министр.

Эске салсак, 10-ноябрда Кыргызстанга Жүрөк хирургиясы жана органдарды трансплантациялоо илим-изилдөө институту жана Кардиология жана терапия улуттук борборунун базасында акысыз операцияларды жүргүзүү үчүн Король Салман атындагы гуманитардык жардам жана куткаруу борбору аркылуу Сауд Аравия Королдугунан 30 хирург келген.

Бүгүн, 2023-жылдын 17-ноябрында Бишкек шаарындагы №1 Шаардык клиникалык ооруканасында 40 орундуу эндокринология бөлүмүнүн имараты капиталдык оңдоодон кийин ачылды.

Иш-чарага КРнын Саламаттык сактоо министри Алымкадыр Бейшеналиев, Бишкек шаардык кеңешинин депутаты Таалай Сариев, оорукананын жетекчилиги жана кызматкерлери жана башкалар катышышты.

№1 Шаардык клиникалык оорукананын башкы дарыгери Акылбек Мусаев бул бөлүмдүн имаратында курулгандан бери капиталдык оңдоп-түзөө иштери жүргүзүлбөгөндүгүн белгиледи. Капиталдык оңдоо иштери шаардын эсебинен, Бишкек шаардык мэриясынын алдындагы Капиталдык курулуш башкармалыгы тарабынан 12 миллион сомдон ашык суммага жүргүзүлгөн. Имараттын чатыры жана фасады толугу менен жаңыланып, сантехника, жылытуу системалары алмаштырылды.

Министр бейтаптарды дарылоого шарт түзүү калкка медициналык жардам көрсөтүүнүн сапатын жогорулатууга жардам берерин баса белгиледи. «Бишкекте эки гана саламаттык сактоо мекемесинде эндокринологиялык ооруларды дарылоо боюнча адистештирилген бөлүм бар. Ал эми алардын бири бул жерде, №1 Шаардык клиникалык оорукананын базасында. Бул бөлүмдө жыл сайын миңден ашык бейтап тажрыйбалуу адистердин аркасы менен дарыланып чыгат. Оорукананын тажрыйбалуу жетекчисине жана ынтымактуу жамаатына ийгилик жана ден соолук каалайм”,-деди КРнын Саламаттык сактоо министри Алымкадыр Бейшеналиев. Муну менен катар №1 Шаардык клиникалык ооруканага тез жардам унаасы бөлүнүп, КТ аппаратын орнотуу мүмкүнчүлүгү карала турганын кошумчалады.

Эмчек рагы менен ооруган аялдарга медициналык жардам көрсөтүүнүн сапатын жогорулатуу максатында Улуттук онкология жана гематология борборунда 30 койкалуу жаңыланган маммология бөлүмү ачылды.

Бул хирургиялык бөлүмдөгү аялдар бөлмөлөрүндө бейтаптардын ыңгайлуулугу жана коопсуздугу үчүн бардык зарыл шарттар бар, ар бир бөлмөдө жуунучу бөлмөлөр, жекече кам көрүү жана операциядан кийин аялдар үчүн коопсуз шарттар түзүлгөн.

Белгилей кетсек, бул бөлүм бейтаптарды психологиялык жактан колдоого да көңүл бурат. Дарыгерлер жана медайымдар бул оор мезгилде ар бир аял өзүн маанилүү жана колдоого алынганын сезишине ынанышат.

«Мени Кыргызстандагы медицина кызматкерлеринин тырышчаактыгы жана аракетчилдиги абдан таң калтырды, алар адамдарга жардам берип, кам көрүп, эмдөө аркылуу балдар менен чоңдорду ар кандай оорулардан коргоп жатышат. Бүгүн Бишкектин тургундары эмдөөдөн өтүп жатканын көрүп абдан кубандым. Эмдөө көптөгөн жугуштуу оорулардан коргонуунун жөнөкөй, коопсуз жана эффективдүү жолу экенин эстен чыгарбоо керек», - деп белгиледи өз сөзүндө ДССУнун Европа регионалдык бюросунун аймактык директору, доктор Ханс Клюге КР Саламаттык сактоо министринин орун басары Бүбүжан Арыкбаева жана  ДССУнун Кыргыз Республикасындагы өкүлү доктор Ливиу Ведраско менен биргелешкен көчмө иш сапарынын жүрүшүндө.
Коноктор бүгүн Ак-Ордо жаңы конушундагы Үй-бүлөлүк дарыгерлер тобуна барып, баштапкы деңгээлдеги коомдук саламаттык сактоонун кызматынын иши менен таанышышты.
Өз кезегинде Ак-Ордо үй-бүлөлүк дарыгерлер тобунун медицина кызматкерлери конокторго күнүмдүк иштери, ошондой эле кызамыкка каршы эмдөө боюнча иш-чаралар тууралуу айтып беришти. Коноктор ата-энелер жана балдар менен баарлашып, жалпысынан Үй-бүлөлүк дарыгерлер тобунун деңгээлинде медициналык кызмат көрсөтүүлөр тууралуу, тактап айтканда, эмдөө боюнча кызмат көрсөтүүлөрдү талкуулашты. Сапардын жүрүшүндө Республикалык эмдөө борборунун директору Гүлбара Ишенапысова ДССУ менен кызматташуу тууралуу жана 2023-жылдын сентябрынан тарта бир катар аймактарда кызамык оорусуна жооп катары демилгеленген эмдөө өнөктүгүнүн жыйынтыктары жөнүндө кеңири айтып берди.
«Кыргыз Республикасынын улуттук эмдөө программасынын маанилүү кадамы Бишкектин тегерегиндеги жаңы конуштарда эмделбеген балдардын жана шаардык мигранттардын эмдөөгө жеткиликтүүлүгүн камсыздоо болду. Дүйнөлүк саламаттык сактоо уюму тарабынан колдоого алынган мыйзамдарга талдоо жүргүзүү ички мигранттардын балдарына улуттук календарга ылайык эмдөөлөрдү өз убагында жүргүзүүнү камсыз кылуу менен жашаган жери боюнча эмдөөгө уруксат берүү үчүн мыйзамдарга өзгөртүүлөрдү киргизүүгө алып келди», - деди Бүбүжан Арыкбаева, КР Саламаттык сактоо министринин орун басары.

Бишкек шаарында жана Чүй облусунда 16-20-ноябрь күндөрү медициналык кызматкерлерге Кардиология боюнча чукул жардам программасынын алкагында курч кармаган миокард инфаркты жана инсульт учурундагы негизги кызматтар боюнча окуулар өткөрүлөт.

  170тен ашык медицина кызматкерлери баштапкы деңгээлде диагностикалоонун жана дарылоонун, саламаттык сактоонун кийинки этабына которуунун, ошондой эле зарыл болгон учурда ооруканага жаткыруунун негизги маселелери боюнча Улуттук кардиология жана терапия борборунда жана Улуттук госпиталда окутулат.

Бүгүнкү иш-чарада саламаттык сактоо министринин орун басары Айжамал Шамбетова сөз сүйлөп жатып, бейтаптарды БМСЖдан кайра багыттоо боюнча жакшы координацияланган системанын маанилүүлүгүн, анда курч кармаган миокард инфаркты жана инсульттун белгилерин өз убагында аныктоо керектигин, ал эми үчүнчү даражадагы саламаттык сактоо уюмдарынын башчылары ST сегментинин көтөрүлүшү жана инсульт менен курч кармаган миокард инфаркты боюнча негизги кызматтарды күчөтүүнү координациялап, бейтаптарга бардык зарыл болгон жогорку технологиялык, адистештирилген жардамды көрсөтүүгө тийиш экенин белгиледи

УКжТБнын директору, профессор Талант Сооронбаев “Ыкчам кардиология” программасын ишке ашырууда Борбордун флагман болууга, ошондой эле аймактардан келген дарыгерлерге методикалык жардам көрсөтүүгө, тромболитикалык терапия боюнча иш ордунда окутууга даяр экендигин билдирди.

Мындан тышкары, бейтаптарга жардам көрсөтүүдө медайымдардын ролу жогорулап жатканын эске алуу менен аларды инфаркт жана инсульт учурунда алгачкы симптомдорду таанууга жана биринчи жардам көрсөтүүгө үйрөтүү пландалып жатканы белгиленди.

Бул тренинг Дүйнөлүк саламаттыкты сактоо уюму тарабынан колдоого алынат.

16-ноябрда Көз карандысыз Мамлекеттер Шериктештигине мүчө-мамлекеттердин Парламенттер аралык ассамблеясынын алкагында Кыргыз Республикасынын Саламаттык сактоо министри Алымкадыр Бейшеналиев 2023-ж. КМШнын Саламаттык сактоо боюнча кызматташуу кеңешиндеги Кыргыз Республикасынын төрагалыгынын ишинин негизги жыйынтыктары жөнүндө баяндама жасады.

Иш-чара Казакстан Республикасы менен Россия Федерациясынын тең төрагалыгы астында, Кеңештин мүчөлөрүнүн жана КМШ Аткаруу комитетинин активдүү колдоосу менен жүргүзүлдү. 2023-жылы Кеңештин алкагында жүздөн ашык иш-чара өтүп, эки жүз отузга жакын маселе каралган.

Министр өз сөзүндө Кеңештин жыйынтыктоочу жыйынында саламаттыкты сактоо тармагындагы кадрдык камсыздоого, клиникалык сунуштарды иштеп чыгууга, бейтаптарды дары-дармек менен камсыздоого, кант диабети боюнча диагностикалык жана мониторингдик инструменттер менен камсыздоого өзгөчө көңүл бурулганын баса белгиледи, кургак учук жана онкологиялык ооруларга каршы күрөшүү, ошондой эле электрондук саламаттыкты сактоону өнүктүрүү перспективалары каралды, Шериктештиктин өлкөлөрүндөгү эпидемиологиялык абал талдоого алынды, трансфузиология жана аймактарды санитардык коргоо жаатында бир катар документтер кабыл алынды, базалык уюмдардын ишинин натыйжалары, Советтин комиссияларынын жана жумушчу топторунун жыйынтыктары чыгарылды.

«Натыйжада быйылкы жылдын күн тартибине коюлган 17 маселе боюнча эксперттик кеңештер өткөрүлүп, алар боюнча чечимдер акыркы резолюцияга киргизилди. Бул резолюцияда биз саламаттыкты сактоо тармагындагы эң актуалдуу маселелерди чагылдырдык. Мисалы, кадр маселеси Кыргызстанда эле эмес, КМШнын бардык өлкөлөрүндө бар. Буга байланыштуу Россия Федерациясынын, Беларусиянын, Казакстандын жана башкалардын саламаттык сактоо уюмдарында тажрыйба алмашуу, адистештирүү боюнча мамлекеттер ортосунда келишимге кол коюлду. Ошондой эле дары-дармек менен камсыздоого чоң көңүл бурулду. КМШнын Саламаттык сактоо боюнча кеңешинин XXXVI отурумунун алкагында кабыл алынган бардык макулдашуулар жана чечимдер жакынкы аралыкта оң натыйжаларды берет деп ишенебиз», - деп жыйынтыктады сөзүн Кыргыз Республикасынын Саламаттык сактоо министри Алымкадыр Бейшеналиев.

Европа аймагында кызамыктын таралышы уланууда. Бүткүл дүйнөлүк саламаттыкты сактоо уюмунун маалыматы боюнча октябрь айына карата Казакстан Республикасында 13 миңден ашуун учур, Россия Федерациясында 8 миң 600 учур, Өзбекстанда 164 учур жана Түркияда 2 миң 600 учур катталган.

Республикалык иммунопрофилактика борборунун маалыматы боюнча, 2023-жылдын башынан бери кызамык менен ооруган 4098 учур аныкталган. Аймактар ​​боюнча: Бишкек шаары – 1123 учур, Ош шаары – 338 учур, Ош облусу – 703 учур, Баткен облусу – 102 учур, Чүй облусу – 591 учур, Жалал-Абад облусу – 1029 учур, Талас облусу – 95 учур, Ысык-Көл облусу облуста – 72 учур, Нарын облусунда – 45 учур.

Жаш курагы боюнча бөлүштүргөндө 88,3% же 3619 учур 10 жашка чейинки балдар. Оорулуулардын эмдөө абалы боюнча 87% же 3140 бейтап ар кандай себептер менен эмдөөдөн өткөн эмес.

Кызамык вирусунун активдүү циркуляциясы Бишкек, Жалал-Абад жана Чүй облустарында байкалууда, бул жерде вирустун жугушу уюшкан топтордогу эмделбеген балдар арасында кездешүүдө. 

Кызамыктын очогун локализациялоо үчүн кызамыкка жана кызылчага каршы “толуктоочу” эмдөө кызамыкка каршы вакцина менен пландуу эмдөөнүн алкагында жүргүзүлүүдө, ошондой эле шаарларда кызамык жана кызамык оорусуна каршы кошумча эмдөө кампаниясы улантылууда. Бишкек, Ош шаарларында, Ош жана Чүй облустарында 468667 бала эмдөө алды, бул 77%ды түзгөн. Жалал-Абад облусунда кызамык оорусу күчөгөнүнө байланыштуу уюшкан топтордогу балдарды кошумча эмдөө иштери башталды. Мындан тышкары, бардык курактагы байланыштагы адамдар 72 сааттын ичинде ыкчам түрдө эмдөөдөн өткөрүлөт.

Урматтуу ата-энелер!

Кызамык оорусу татаалдашуусу менен кооптуу. Балдарды коргоо силердин колдо, алардын 12 айындагы (КПК) жана 6 жашындагы (КПК ревакцинациясы), ошондой эле ҮМБ/ҮДТ/ФАПтарда 9 айдан 7 жашка чейинки кошумча эмдөө дозасын (КПК) алуусун камсыз кылыныздар. Эмдөө бекер.

15-ноябрда Көз карандысыз Мамлекеттер Шериктештигинин Саламаттыкты сактоо тармагындагы Кызматташтык Кеңешинин XXXVI отурумунун алкагында Россия Федерациясынын Саламаттык сактоо министри Михаил Мурашко академик М.Миррахимов атындагы Улуттук кардиология жана терапия борборуна барды. 

Улуттук кардиология жана терапия борборунун директору, профессор Талантбек Сооронбаев Орусиянын Саламаттык сактоо министрлигинин жетекчисин Улуттук борбордун иши менен тааныштырып, мекеменин жетишкендиктери жана пландары тууралуу айтып берди.

Саламаттык сактоо системасын өнүктүрүүгө кошкон зор салымы үчүн Михаил Мурашкого «Улуттук кардиология жана терапия борборунун ардактуу профессору» наамы ыйгарылды.

2023-жылы Кыргыз Республикасынын Саламаттык сактоо министрлиги, КР Саламаттык сактоо министри Алымкадыр Бейшеналиевдин атынан Көз карандысыз Мамлекеттер Шериктештигинин Саламаттыкты сактоо боюнча кызматташуу кеңешине төрагалык кылган.

Кеңештин мүчөлөрү – КМШга мүчө-мамлекеттердин министрлери жана мамлекеттик башкы санитардык дарыгерлер, 2023-жылга карата иштердин жыйынтыгын чыгарып, саламаттыкты сактоонун актуалдуу маселелери жана КМШ форматындагы өз ара аракеттенүү маселелери боюнча пикир алмашышты, аны менен катар 2024-жылы кеңешке төрагалык кылуу чечимине келишти.

Кеңешмеде ошондой эле саламаттыкты сактоо тармагындагы кадр маселеси талкууланып, клиникалык сунуштарды иштеп чыгууга болгон мамиле, бейтаптарды дары-дармек менен камсыздоо, кант диабетин диагностикалоо жана мониторинг жүргүзүү каражаттары, кургак учук жана онкологиялык ооруларга каршы күрөшүүдөгү жетишкендиктер, саламаттыкты сактоо тармагын өнүктүрүүнүн келечеги талкууланды. 

Андан сырткары электрондук саламаттыкты сактоо маселелери каралып, шериктештик өлкөлөрүндөгү эпидемиологиялык кырдаал талдоого алынды, ошондой эле трансфузиология жана аймактарды санитардык коргоо жаатындагы бир катар документтер кабыл алынды, базалык уюмдардын, комиссиялардын жана жумушчу топтордун ишинин жыйынтыктары, кеңешинин жыйынтыгы чыгарылды.

Кеңешменин чечиминде Көз карандысыз Мамлекеттер Шериктештигинин жогорку органдарынын демилгелерин ишке ашырууга өзгөчө көңүл бурулду.

Кыргызстандын төрагалыгы астында Бишкекте өткөн, КМШга мүчө өлкөлөрдүн саламаттык сактоо жаатындагы кызматташтык кеңешинин жыйынында кургак учук менен күрөшүүдөгү жетишкендиктери талкууланды. Бул ооруга чалдыккандардын жана өлүмгө учурагандардын олуттуу кыскаруусу, ошондой эле оорулууларды диагностикалоонун жана медициналык тейлөөнүн жакшырышы белгиленген.

КМШга мүчө мамлекеттердин АИВ/ЖИКС, кургак учук жана безгек боюнча координациялык кеңешинин алдындагы кургак учук боюнча жумушчу топтун мүчөсү, Белорусиялык Жанна Сапрыкина кургак учукту дарылоонун жаңы ыкмалары ийгиликтүү ишке ашырылып жатканын жана өлкөдө видео көзөмөлдөгү дарылоонун бар экендигин белгиледи. 

Бул жетишкендиктер КМШга мүчө өлкөлөрдүн кургак учукка каршы күрөшүүдөгү олуттуу иштеринин күбөсү. Жаңы дарылоо ыкмаларын ийгиликтүү киргизүү жана заманбап дарылоо технологияларынын болушу, кургак учукка каршы кырдаалды жакшыртуудагы маанилүү кадам болуп саналат.

Кургак учук менен күрөшүү саламаттык сактоонун артыкчылыктуу багыттарынын бири бойдон калууда жана КМШга мүчө өлкөлөр бул багыттагы аракеттерин улантат. Бул илдет менен натыйжалуу күрөшүү үчүн тажрыйба алмашууну жана биргелешкен долбоорлорду колдоо маанилүү.

Бүгүн, 2023-жылдын 15-ноябрында, КМШ өлкөлөрүнүн саламаттык сактоо тармагындагы кызматташуу кеңешинин 36-жыйынынын алкагында Кыргыз Республикасынын Саламаттык сактоо министри Алымкадыр Бейшеналиев менен Россия Федерациясынын Саламаттык сактоо министри Михаил Мурашконун эки тараптуу жолугушуу болуп өттү.

Жолугушууда тараптар саламаттык сактоо тармагындагы кызматташуунун артыкчылыктуу багыттарын, атап айтканда, кадрлар менен камсыз кылуу, эки өлкөнүн адистеринин түрдүү тармактарда тажрыйба алмашуусу, фармацевтика тармагы жана дары-дармек менен камсыздоо маселелерин талкуулашты.

Министр, Алымкадыр Бейшеналиев кесиптешине салам жолдоп, Кеңештин теңтөрагасы катары активдүү иши, өз ара аракети жана колдоосу үчүн ыраазычылык билдирди.

«Учурда Орусия тарап менен саламаттык сактоо тармагындагы кызматташуу абдан активдүү, биздин өлкөлөр ортосунда көптөгөн биргелешкен долбоорлор жана пландар ишке ашырылууда. Мен Россия Федерациясынын адамдын укуктарын коргоо жана адамдын бейпилдигин көзөмөлдөө боюнча федералдык кызматы аркылуу кызматташуу жаатындагы активдүүлүгү үчүн абдан ыраазымын. Саламаттык сактоо жана медицина тармагындагы, ошондой эле калктын санитардык-эпидемиологиялык бакубаттуулугу жаатында кызматташуу жөнүндө өкмөттөр аралык макулдашууга кол коюуга даярдык көрүү боюнча иштер жүрүп жатат. Бул Келишимге жакын арада биз тарабынан кол коюлат деп ишенем. Мындан тышкары, соода-экономикалык, илимий-техникалык жана гуманитардык кызматташуу боюнча өкмөттөр аралык комиссиянын жыйындары жыл сайын өткөрүлүп турат, анда кызматташуунун актуалдуу багыттарын киргизүү жана аларды ыкчам чечүү мүмкүнчүлүгү бар. «Росатом» Ачык акционердик коому аркылуу онкология тармагында жемиштүү кызматташуудабыз, алсак, октябрь айында бул корпорация менен биргеликте Улуттук онкология жана гематология борборунда ядердик медицина бөлүмүн ачтык», - деди Саламаттык сактоо министри Алымкадыр Бейшеналиев.

Михаил Мурашко өз кезегинде кадрлардын потенциалын жогорулатуу боюнча жалпы иш-чараларды жүргүзүү зарылдыгын баса белгиледи. Менин көз карашымда, саламаттыкты сактоо системасын комплекстүү өнүктүрүү боюнча биз жемиштүү кызматташа алабыз, бирок ал тармакта өз ара аракеттенүү фрагментардык бойдон калууда. Бул ооруларды дарылоо, фармацевтика тармагын өнүктүрүү жана дары-дармек менен камсыздоо болушу мүмкүн. Россия Федерациясы дайыма жаңы фармацевтикалык заводдорду ачып, өзүнүн дары-дармектерин, анын ичинде онкологиялык оорулуулар үчүн дарыларды чыгарат, бул аларга импорттук аналогдордон баш тартууга мүмкүндүк берет». 

Ошондой эле, өз ара аракеттешүүнү жакшыртуунун алкагында Россия Федерациясынын Саламаттык сактоо министри Алымкадыр Бейшеналиевди 1-2-декабрга пландаштырылган Москва шаарында өтө турган Саммитке жана Россиянын саламаттык сактоо уюмдарынын жетекчилери, дары-дармектерди жана медициналык буюмдарды өндүрүүчүлөр менен жолугушууларды өткөрүүгө чакырды. 

Отурумдун жыйынтыгында КМШ өлкөлөрүнүн саламаттык сактоо тармагындагы кызматташуу кеңешинин төрагалыгын келерки жылы Россия Федерациясына өткөрүп берүүнүн алкагында тараптар саламаттык сактоо тармагындагы медициналык кадрларын окутуу жана квалификациясын жогорулатуу, фармацевтика, дары-дармектерди сатып алуу, медициналык жабдууларды жана дары-дармектерди чыгаруучу ишканалар менен түздөн-түз кызматташтыкты активдештирүү боюнча макулдашышты.

Көз карандысыз мамлекеттердин шериктештигинин (КМШ) Саламаттык сактоо тармагындагы кызматташуу кеңешинин XXXVI отурумунун алкагында Өзбекстан Республикасынын башкы мамлекеттик санитардык дарыгеринин орун басары Батыржан Курбанов Кыргыз Республикасынын Саламаттык сактоо министрлигинин Ооруларды алдын алуу жана мамлекеттик санитардык эпидемиологиялык көзөмөлдөө департаментине барды. 

Иш чаранын жүрүшүндө Өзбекстан Республикасынын башкы мамлекеттик санитардык дарыгеринин орун басары Өзбекстандын саламаттык сактоо системасынын түзүмү жана комитеттери тууралуу кеңири баяндама берди, бул жолугушуунун катышуучуларына өлкөнүн саламаттыкты сактоо уюмунун өзгөчөлүгү менен таанышууга мүмкүнчүлүк түздү.

Мамлекеттик санитардык-эпидемиологиялык көзөмөлдөө департаментинин директорунун милдетин аткаруучу Асылбек Сыдыканов ведомствонун лабораторияларын жана ыкчам билдирүү бөлүмдөрүнүн иши менен тааныштырды. Бул демилге калктын саламаттыгын камсыздоодо департаменттин ишинин маанилүүлүгүн жана ачык-айкындуулугун көрсөтүү максатында иштелип чыккан.

Учурдагы көйгөйлөрдү жана саламаттык сактоо тармагын өнүктүрүүнүн келечегин активдүү талкуулоонун жүрүшүндө жолугушуунун катышуучулары өздөрүнүн тажрыйбасы жана билими менен бөлүшүштү. Суроо-жооптор КМШ өлкөлөрүнүн саламаттык сактоо уюмдарынын ортосундагы маалымат алмашуунун жана кызматташтыкты чыңдоонун негизи  болду.

2023-жылдын 14-15-ноябрында Бишкек шаарында Кыргыз Республикасынын Саламаттык сактоо министрлигинин төрагалыгы алдында КМШнын Саламаттык сактоо боюнча кызматташуу кеңешинин XXXVI отуруму өтүүдө, анда Россия Федерациясынын Саламаттык сактоо министри Михаил Мурашко, ДССУнун Европа регионалдык бюросунун директору доктор Ханс Клюге жана Көз карандысыз Мамлекеттер Шериктештигине мүчө мамлекеттердин медициналык коомчулугунун өкүлдөрү катышууда.

Саламаттык сактоо тармагындагы кызматташтык кеңеши бүгүнкү күндө өзүнүн актуалдуулугун жана натыйжалуулугун далилдеген саламаттык сактоо маселелери боюнча мамлекеттер аралык диалогдун алдыңкы жана туруктуу платформасы бойдон калууда. Буга акыркы жылдардагы чакырыктар өбөлгө түздү. Бул бардык мамлекеттер туш болгон пандемия. Анын катарында дагы эле олуттуу жана актуалдуу маселе болуп саналган жугуштуу эмес оорулар да бар. Бул биз туш болуп келе жаткан социалдык илдеттер, бүгүнкү күндө биз аларды жеңип жатканыбыз менен, мааниси дагы эле жогору экенин сезилип турат.

«Биздин өлкөлөрдүн саламаттык сактоо системалары жарандарыбыздын ден соолугун коргоого жана чыңдоого багытталган. Шериктештиктин алкагындагы өз ара аракеттенүү Кыргыз Республикасы үчүн чоң кызыгууну жаратат жана биз базалык уюмдар менен да, Кеңештин комиссиялары менен да өз ара кызматташабыз. Ал эми Кеңештин мүчөлөрү менен болгон диалог министрликтердин деңгээлинде кызматташуунун негизги вектору болуп саналат. Кеңештин алкагында жасап жаткан иштерибиз биринчи кезекте КМШнын жогорку органдарынын чечимдерин ишке ашырууга негизделгенин белгилегим келет. Ал эми бизге жүктөлгөн милдеттерди ишке ашыруу үчүн биргелешип бардык күч-аракетибизди жумшашыбыз керек”, -деп билдирди КРнын Саламаттык сактоо министри Алымкадыр Бейшеналиев.

Кеңеш кабыл алган чечимдер Шериктештикке мүчө мамлекеттерге макулдашылган саясат жүргүзүүгө мүмкүндүк берет.

Россия Федерациясынын Саламаттык сактоо министри Михаил Мурашко өз сөзүндө белгилегендей, төрт сааттык аба жолу жугуштуу ооруга таптакыр тоскоол эмес. «Убакытты кыскартып, ошону менен жугуштуу оорулардын өнүгүшүнө же жайылышына шарт түзгөн бүгүнкү коммуникациялар, бүгүнкү транспорт каражаттарын эстен чыгарбашыбыз керек. Ошондуктан, биздин сиздер менен болгон өз ара аракеттенүүбүз конструктивдүү түрдө өз ара пайдалуу болууга жана, албетте, биринчи кезекте жарандарыбыздын ден соолугуна багытталышы керек. Бул факторлордун баары акыр аягында жогорку даярдыкты, медициналык жардам көрсөтүүгө бирдиктүү мамилени жана бирдиктүү жөнгө салуучу учурларды талап кылып, Евразиялык биримдиктин алкагында бизге дары-дармектердин жана медициналык буюмдардын жалпы рыногуна ээ болууга мүмкүндүк берет. Мына ушулардын бардыгы жаңы технологияны ишке киргизүүгө жана дарылоонун жаңы методдорун киргизүү үчүн мамлекеттик ресурстарды үнөмдөөгө мүмкүндүк берген ачык-айкын өз ара пайдалуу кызматташтык. COVID-19 чакырыгы саламаттык сактоо тутуму кыйынчылыкка туш болгондо биз канчалык натыйжалуу кызматташа аларыбызды көрсөттү. Адистер менен алмашуу, бейтаптарды биргелешип дарылоо, жаңы жана үзгүлтүксүз жаңыланып турган дарылоо сунуштары - бул аралыктан окутуу үчүн маалымат ресурстарына тоскоолдуксуз жеткиликтүүлүк. Мунун баары бизге жаңы багытта алдыга жылууга шарт түзөт», - деди Россиянын Саламаттык сактоо министрлигинин башчысы М.Мурашко.

  Үстүбүздөгү жылы Евразия экономикалык комиссиянын чечими менен КМШга мүчө-мамлекеттердин калкынын ден соолугун чыңдоо стратегиясын ишке ашыруу боюнча Иш-чаралар планы кабыл алынган. Планды даярдоого көптөгөн мамлекеттердин эксперттери катышты. Ошондой эле КМШга мүчө мамлекеттердин саламаттык сактоо тармагын маалыматташтыруу жана коомдук саламат боюнча базалык уюмдар түзүлдү.

Бул иш-чаранын алкагында делегация мүчөлөрү Бишкек шаарындагы саламаттыкты сактоо уюмдарынын иши менен таанышты. Тактап айтканда, Шериктештикке мүчө мамлекеттердин өкүлдөрү Улуттук онкология жана гематология борборуна, Республикалык кан борборуна, Электрондук саламаттык сактоо борборуна, Стоматологиялык поликлиникага, Үй-бүлөлүк медицина борборуна, Улуттук госпиталга, М.М.Миррахимов атындагы Кардиология жана терапия улуттук борборуна, Эндокринологиялык борборго, Улуттук фтизиатрия борборуна, Шаардык тез жардам ооруканасына барышты. Ошондой эле И.К.Ахунбаев атындагы Кыргыз мамлекеттик медициналык академиясында медициналык кадрларды даярдоонун уюштурулушу менен таанышты.

Мындан тышкары, эксперттер Бүткүл дүйнөлүк диабетке каршы күрөшүү күнүнө арналган “Диабетти дарылоого жеткиликтүүлүк” илимий-практикалык конференциясына катышты.