Copyright: ©
КР Саламаттык сактоо министри телемедицинаны өнүктүрүү боюнча француз компаниясынын өкүлдөрү менен жолугушту
10.08.2024 / Просмотров: 5573
2024-жылдын 9-августунда Францияга болгон жумушчу сапарынын алкагында Кыргыз Республикасынын Саламаттык сактоо министри Алымкадыр Бейшеналиев телемедициналык консультациялар үчүн инновациялык чемоданды иштеп чыгуучу жана чыгаруучу франциялык «Hopi medical» компаниясынын өкүлдөрү менен жолугушуу өткөрдү.
Жолугушуунун жүрүшүндө Кыргыз Республикасынын Ысык-Көл облусунда белек катары берилүүчү жабдууларды колдонууну камтыган пилоттук долбоорду ишке ашыруу маселелери талкууланды. Долбоор Кыргыз Республикасынын Саламаттык сактоо министрлиги тарабынан медициналык жардамдын жеткиликтүүлүгүн кеңейтүү жана саламаттыкты сактоо тармагына санариптик технологияларды киргизүү боюнча жүргүзүлүп жаткан иштердин бир бөлүгү болуп саналат.
Министр француз тарапка практикалык колдоо көрсөткөндүгү үчүн ыраазычылык билдирип, бул жаатта мындан аркы кызматташуунун маанилүүлүгүн белгиледи.
Жолугушууда француз тарап Кыргызстанда долбоорду ишке ашырууга даярдыктын жакшы экенин белгиледи. Долбоор ийгиликтүү ишке ашса, көптөгөн оорулардын алдын алууга жардам берери айтылды. Бул жабдуулар дарылоосу кымбатка турган онкологиялык да, башка ооруларды да эрте диагностикалоого мүмкүндүк берет жана өтүшүп кетүү тобокелдигин жокко чыгарат. Министр өз кезегинде бул долбоорду колдоого даяр экенине ишендирди. «Ысык-Көл облусунун бул долбоор ишке ашырыла турган айыл аймактарында эрте диагностика боюнча адистер жетишсиз. Ал эми сиздердин жабдуулардын мүмкүнчүлүктөрүн колдонуу менен бейтаптардын ден соолугу боюнча маалыматтарды берүү Улуттук госпиталдын дарыгерлерине аралыктан эле рак, кант диабети сыяктуу кымбат баалуу ооруларды эрте аныктоого жана дарылоону баштоого мүмкүндүк берет”, - деп белгиледи Саламаттык сактоо министри Алымкадыр Бейшеналиев. Кыргыз Республикасы.
Жолугушуунун жыйынтыгында тараптар бул долбоорду ишке ашыруу Кыргыз Республикасы менен Франциянын ортосундагы саламаттыкты сактоо тармагындагы кызматташтыкты мындан ары чыңдоонун негизи болуп калаарына ишеним билдиришти.
.jpeg)
Прикрепленные файлы:
Другие Новости
07.09.2024
Ош шаардык клиникалык ооруканасына 5 миллион долларлык медициналык жабдуулар берилет
Бүгүн, 7-сентябрда КР Саламаттык сактоо министри Ош шаарына болгон жумушчу сапарынын алкагында Ош шаардык клиникалык ооруканасында болуп, жаңы курулуп жаткан клиникалык диагностикалык бөлүмдүн курулуш иштеринин жүрүшү менен таанышты.
Оорукананын директору Шаят Абдурахманов министрге курулуш иштери 90%га бүтүп, сентябрь айынын аягына чейин толугу менен бүтөрүн билдирди. Бул бөлүмдүн курулушуна жергиликтүү бюджеттен 53 млн сом бөлүнгөн.
Белгилей кетсек, Кытай грантынын алкагында ОШКО 5 млн долларлык 14 аталыштагы медициналык жабдууларды алат. Ал эми кыргыз тарап консультациялык-диагностикалык бөлүм үчүн өзүнчө имарат куруп бериши керек болчу.
Мындан тышкары, министр 300 орундуу көп функционалдуу оорукананын имаратынын курулушунун жүрүшү менен таанышты. Долбоорду аяктоо 2025-жылга пландалып, бул максатка 595 миллион сом бөлүнгөн. Жалпы аянты 6 633,5 м2 болгон оорукана 3 блоктон туруп, анда кардиология, ортопедия, ЛОР, көз, урология, эндокринология жана терапевтик бөлүмдөр жайгашат. Ошондой эле операциялык жана реанимация бөлүмдөрү, ашкана, кир жуучу жай, кампалар болот.
07.09.2024
Ош облустар аралык бириккен клиникалык ооруканасында катарактага акысыз операциялар жасалууда
Бүгүн, 2024-жылдын 7-сентябрында, Кыргыз Республикасынын Саламаттык сактоо министри Алымкадыр Бейшеналиев 2-сентябрдан бери катаракта боюнча акысыз операциялар жүргүзүлүп жаткан Ош облустар аралык бириккен клиникалык ооруканасына (ООКБО) барды. Бул операциялар “Экспресс ден соолук: жаркын саякат” долбоорунун алкагында 2-сентябрдан 12-сентябрга чейин жүргүзүлөт.
Министр менен бирге ООКБОго Кытай Эл Республикасынын Кыргызстандагы Атайын жана Ыйгарым укуктуу элчиси Ду Дэвэнь айым, Кыргыз Республикасынын Президентинин Ош облусундагы ыйгарым укуктуу өкүлү Элчибек Жантаев жана башка коноктор да келишти.
Үстүбүздөгү жылдын 2-сентябрынан баштап кытайлык адистердин тобу өз күч-аракетин катарактадан жапа чеккен жана көрүүсү начарлаган бейтаптарга жардам берүүгө багыттоодо. Долбоордун командасы 10 күндүн ичинде үч облустан: Ош, Жалал-Абад жана Баткенден келген бейтаптарга катарактага бекер операция жасашат. Учурда 100гө жакын бейтапка операция жасалып, жалпысынан 300 кыргызстандыкка операция жасоо пландалууда.
Мындан тышкары, Кытай тарап оорукананын жетекчилигине наркы 7,5 миллион сомдон ашык турган офтальмологиялык жабдууларды өткөрүп берүү сертификатын тапшырды.
Саламаттык сактоо министри Алымкадыр Бейшеналиев Кытай Эл Республикасынын Өкмөтүнө Кыргыз Республикасынын саламаттыкты сактоо тармагына кошкон салымы үчүн ыраазычылык билдирди. Ал ошондой эле долбоор эки өлкөнүн ортосундагы достук мамилелерди өнүктүрөөрүн баса белгиледи. “Өткөн жылы бул долбоордун аркасында 600дөн ашык кыргызстандыктар катарактага бекер операция жасатышкан. «Экспресс ден соолук» долбоору көрүү мүмкүнчүлүгүн гана калыбына келтирбестен, бейтаптарга жашоонун кубанычын жана келечекке болгон үмүтүн кайтарып берди. Бул медициналык долбоор биргелешкен аракеттер адамдардын жашоосунда олуттуу өзгөрүүлөргө алып келеринин үлгүсү жана далили болуп калды”, - деп кошумчалады Кыргыз Республикасынын Саламаттык сактоо министри Алымкадыр Бейшеналиев.
07.09.2024
Ош облустар аралык бириккен клиникалык оорукананын аймагында 3 мамлекеттик «Эл Аман» дарыканасы иштейт
Бүгүн, 7-сентябрда Кыргыз Республикасынын Саламаттык сактоо министри Алымкадыр Бейшеналиев кезектеги “Эл Аман” мамлекеттик дарыканасынын ачылыш аземине катышты.
Ош облустар аралык бириккен клиникалык ооруканасынын базасында мамлекеттик дарыкана ачылды. Бул оорукананын аймагында иштеп, калкты жеткиликтүү дары-дармектер жана медициналык буюмдар менен камсыз кылган үчүнчү дарыкана.
Учурда республика боюнча 86 “Эл Аман” мамлекеттик дарыкана ийгиликтүү иштеп жатат.